माओवादी नायः प्रचण्ड नेपाः लिहाँझाल

मलेशियाय् झायाः च्वनादीम्ह एकीकृत नेकपा (माओवादी)या नायः पुष्पकमल दाहाल 'प्रचण्ड' थौं नेपाः देय् लिहाँ झायादीगु दु ।

थः न्वकु जुयाच्वंगु एशिया प्यासिफिक एक्सचेन्ज एण्ड कोअपरेसन फाउण्डेसन (एपेएकोफा) या बैठकय् ब्वति कायेत वय्कः आइतबाः मलेशिया झायादीगु खः । वय्कः थौं सुथय् झिंछताः इलय् झायादीगु निजी सचिवालयं जानकारी ब्यूगु खः । नायः प्रचण्डलिसे झायादीम्ह माओवादी बिदेश बिभाग प्रमुख कृष्णबहादुर महरा नं थौं हे लिहां झायादीगु खः ।

लुम्बिनीइ स्वंगू अर्ब अमेरिकी डलरया महत्वाकांक्षी परियोजना घोषणा याःगु चीनिया संस्थाया आधिकारिता व विश्वसनीयताय् न्ह्यसः ब्वलनाः च्वंगु इलय् उगु हे संस्थाया आकस्मिक बैठकय् ब्वति कायेत नायः प्रचण्ड वंगु आइतवाः बहनी मलेशिया झायादीगु खः ।