तःजिक हन विश्व आदिवासी दिवस
'आदिवासीतय्सं थःगु संस्कृतिया ढाँचाकथं थःगु भविष्य थःम्हं हे निर्माण याये' धइगु नारालिसे झिंन्ह्यक्वःगु विश्व आदिवासी दिवस मंगलवाः नेपालय् नं थीथी ज्याझ्वःलिसे हन । दिवसया लसताय् येँय् सांस्कृतिक झाँकी सहितया र्याली नापं पिकाःगु खः । नेपाल आदिवासी जनजाति महासंघ, राष्ट्रिय आदिवासी जनजाति महिला मञ्च, नेपाल आदिवासी जनजाति पत्रकार संघ, नेपाल आदिवासी जनजाति महासंघ लगायतया दर्जनौं आदिवासी संघ संस्थाया मंकाः ग्वसालय् पिकाःगु उगु र्याली राष्ट्रिय सभागृहपाखें न्ह्याःगु खःसा भद्रकाली, शहीदगेट, न्हू सतक, रत्नपार्क जुयाः हाकनं राष्ट्रिय सभागृहलय् वयाः क्वचाःगु खः ।
र्यालीइ थीथी जातजातिपाखें ब्वति दुगुलिं ब्यागलं ब्यागलं जातिया म्हसीका व संस्कृति पिज्वइगु वसःत पुनाः बाजा झाँकी ब्वज्या याःगु खः । र्याली लिपा जूगु ज्याझ्वलय् नेपाल आदिवासी जनजाति महासंघया नायः राजकुमार लेखीं जनजाति आदिवासीया मुद्दायात सरकारं म्हो महत्व ब्यूगुलिं न्हूगु दयेकीगु संविधानय् आदिवासीया हकअधिकार सुनिश्चित यायेमाःगु धयादिल ।
थ्वहे झ्वलय् संविधानसभाया नायः सुवास नेम्बाङं दलतय्गु आन्तारिक कचवंया कारण संविधान निर्माण व शान्ति प्रकृया न्ह्यायेमफूगु खँ दुर्भाग्यपूर्ण जूगु धयादिल । वय्कलं देय्यात निकास बीमाःगु इलय् दलत थःथःपिनिगु दुने हे मतभेदय् तक्यनाः छखा हे छेँय् ब्यागलं ब्यागलं भुतू दयेकेपाखें वंगु धयादिसें दुःख प्वंकादिल ।
सभाध्यक्ष नेम्बाङं दलत छधी जुइगुया विकल्प मदुगु धयादिसें न्यागू बुँदाया सहमति कार्यान्वयनय् गम्भीरता क्यनेत इनाप नं यानादिल । वय्कलं थ्व आदिवासीया दिवस राज्यया हे दिवस जुइमाःगुलिइ सरकारं सरकारी बिदा तक्क नं मब्यूगु धयादिसें सरकारया ध्यानाकर्षण नापं यानादिल । आदिवासी जनजातिं ल्ह्वंगु सः देय्या हे मुद्दा जूगुलिं राज्यं देय्या हे दिवसया रुपय् हनेमाःगुलिइ बः बियादिल ।
संयुक्त राष्ट्र संघया इनापय् प्रत्येक दँया अगष्ट ९ तारिख कुन्हु विश्व आदिवासी दिवस हनाः वयाच्वंगु खः ।
