आः छेँखा पतिकंया नेवाःतय्त सतकय् क्वकायेमाः'
संविधानसभापाखें नेवाः राज्य सुनिश्चित यायेगु खःसा आः हरेक नेवाःतय् छेँखापतिकंया दुजःतय्त सतकय् क्वकायेमाःगु बिचाः नेवाः सभासद्तय्सं प्वंकूगु दु । सभासद्तय्सं आः गोष्ठी व ज्ञापनपौ लःल्हायेगु थज्याःगु ज्या मयासें नेवाःतय्त सतकय् हयाः तःधंगु आन्दोलन यायेमाःगु बिचाः प्वंकूगु दु ।
नेवाः स्वायत्त राज्य मंकाः संघर्ष समितिं सोमवाः संविधानसभा व नेवाः स्वायत्त राज्य बारे याःगु छगू अन्तक्रिया ज्याझ्वलय् एनेकपा (माओवादी), नेकपा (एमाले) व नेपाः राष्ट्रिय पार्टीया नेवाः सभासदतय्सं संविधान निर्माण यायेगु ज्याय् सभासद्तपाखें मजूसें छगू पुचः, आयोग व स्वम्ह नेतात च्वनाः जक यायेत्यंगु धासें नेवाः राज्य प्राप्तिया निंतिं आः सशक्त सतक संघर्ष यायेमाःगु खँय् बः बिउगु खः ।
मंकाः संघर्ष समितिया नायः दिलबहादुर श्रेष्ठया सभापतित्वय् जूगु ज्याझ्वलय् एनेकपा (माओवादी)या सभासद् हितमान शाक्यं राज्य पुनर्संरचना व राज्य शक्ति बाँडफाँट समिति हे दयेके मज्यू धकाः जूपिं नेतात थौं वयाः राज्य पुनर्संरचना आयोग गठन यायेमाः धकाः संघीयताय् मवनेगु षड्यन्त्र यानाच्वंगु द्वपं बियादिल । वय्कलं माओवादी पार्टी नेवाः राज्यया पक्षय् दुगु स्पष्ट यानादिसें यदि माओवादीं नेवाः स्वायत्त राज्यया माग त्वःतुसाः थःम्ह माओवादी पार्टी हे त्वःतेगु घोषणा तकं यानादिल ।
नेकपा (एमाले)या सभासद् मंगलसिद्धि मानन्धरं कांग्रेसं पहिचान व समार्थ्यया आधारय् राज्य पुनर्संरचना यायेगु धाःसां न्हय्गू प्रदेशं जक पहिचान व समर्थ्ययात सम्बोधन यायेमफइगु दावी यानादिल । वय्कलं स्वायत्तता व स्वाशसन बिना झीगु पहिचानया रक्षा यायेमफइगु नं धयादिल ।
अथेहे नेपाः राष्ट्रिय पार्टीया सभासद् बुद्ध साय्मिं राजधानी प्रदेश दयेके न्ह्यः नेवाःतय् लशय् न्हुया वनेत नेतातय्त हाथ्या बियादिल । वय्कलं आः भाषण जक मबिउसें सतक आन्दोलन यानाः नेवाः राज्य सुनिश्ति यायेमाःगु खँय् बः बियादिल ।
ज्याझ्वलय् मंकाः संघर्ष समितिया सचिवालय कजि मल्ल के. सुन्दरं भदौ १४ दुने संघीयता बिनाया मस्यौदा तयार यायेगु व लिपा स्वनिगःयात राजधानी प्रदेश दयेकेगु षड्यन्त्र जुयाच्वंगु धयादिल ।
