लोकतान्त्रिक नेवाः दबूपाखें राजधानी प्रदेश अस्वीकार
नायलय् हानं गजेन्द्र मानन्धर निर्वाचित
नेपाली कांग्रेसया भातृ संगठन लोकतान्त्रिक नेवाः दबूलिं कांग्रेस केन्द्रीय समितिं स्वनिगःयात राजधानी प्रदेश दयेकेगु कथं याःगु प्रस्तावयात अस्वीकार याःगु दु । केन्द्रीय मुँज्यां राजधानी प्रदेश दुथ्याकाः न्हय्गू प्रदेश सहितया राज्य पुनर्संचनाया प्रस्ताव याःगु कन्हय् कुन्हु हे नेवाः दबूलिं उकियात अस्वीकार याःगु खः ।
लोकतान्त्रिक नेवाः दबूया सोमवाः येँय् क्वचाःगु निगूगु तःमुँज्यां राजधानी प्रदेशयात अस्वीकार यासें पहिचान व समार्थ्यया आधारय् नेवाः प्रदेश दयेमाःगु माग याःगु दु । हानं गजेन्द्र मानन्धरयात नायः पदय् निर्वाचित याःगु नेवाः दबूलिं नेवाः प्रदेश नेपालमण्डल जुइमाःगु माग नापं राजधानी प्रदेश धकाः केन्द्रीय समितिं याःगु प्रस्ताव खारेज यायेमाःगु माग यासें कन्हय् कांग्रेस सभापति सुशील कोइरालायात छगू ज्ञापनपौ लःल्हायेगु निर्णय याःगु दु ।
अथेहे दबूलिं नेवाः प्रदेशया लागा ऐतिहासिकता व निरन्तरताया आधारय् क्वःछिइमाःगु माग नं याःगु दु । सभापित कोइरालायात लःल्हाइगु उगु ज्ञापनपौ फुक्कं केन्द्रीय दुजःतय्त नं बिइगु खँ नेवाः दबूया नायः गजेन्द्र मानन्धरं नेपालमण्डलयात कनादिल ।
सोमवाः क्वचाःगु नेवाः दबूया निक्वःगु तःमुँज्यां हानं मानन्धरया नेतृत्वय् झिंन्याम्हेसिया कार्यसमिति दयेकूगु दु । उगु कार्यसमितिया पदाधिकारीतय् पद विभाजन धाःसा छुं न्हि लिपा जुइगु जानकारी नं नायः मानन्धरं बियादिल ।
