हनुमानध्वाखा दरवारय् च्वंगु तःग्वः गंया मचा कुतुंवन
येँया हनुमानध्वाखा दरवार परिसरय् च्वंगु तःग्वः गंया मचा कुक्तंवःगु दु ।
म्हिगः सुथसिया गुताः इलय् न्हियांन्हिथं पूजा यायेगु झ्वलय् रिङ त्वःधुलाः मचा कुतुंवःगु पुजारी उद्वव कर्माचार्यं जानकारी बियादीगु खः ।
मल्लकालीन इलय् जुजु प्रताप मल्लं स्थापना याःगु दक्षिण एसियाया हे दक्कलय् तग्वःगु गं कथं कयातःगु उगु गं विश्व सम्पदाया धलखय् दुथ्याकातःगु दु । तान्त्रीक विधिपाखें दयेकातःगु दरवारया छुं नं भौतिक संरचनाय् हिउपाः वा स्यन धाःसा अशुभ जुइगु स्थानीय मनूतय्गु धापू दु । थ्वहे कथं गंया मचा कुतुंवःगु धइगु अशुभ जूगुिलं देशय् तःधंगु राजनीतिक संकट वयेफइगु पुजारी कर्माचार्यया धापू दु ।
तलेजु देगलय् विधिपूर्वक पूजा यानाः न्हिया न्हिथं सच्छि व च्याक्वः तक गं थायेगु याना वयाच्वंगु खः । म्हिगः धाःसा न्याक्वः तक थायेधुंकाः गंया मचा कुतुंवःगु पुजारी कर्माचार्यं जानकारी बियादीगु दु ।
