शान्ति प्रकृया पूवंकेत प्रमया न्हूगु प्रस्ताव
साउन २८ गते दुने शान्ति प्रकृयां गति काये मफूसा राजीनामा बी धयादीम्ह प्रधानमन्त्री झलनाथ खनालं शान्ति प्रकृया व संविधान दयेकेगु ज्या पूवंकेत न्हूगु ज्याधलःया प्रस्ताव न्ह्ब्वयादीगु दु ।
माओवादी नायः पुष्पकमल दाहाल 'प्रचण्ड' व कांग्रेस संसदीय दलया नेता रामचन्द्र पौडेललिसे बिहीवाः बहनी जूगु मंकाः सहलहस प्रधानमन्त्री खनालं न्हूगु ज्याधलःया प्रस्ताव तयादीगु खः । प्रधानमन्त्री निवास बालुवाटारय् जूगु उगु सहलहस न्हूगु ज्याधलः प्रस्ताव न्ह्यब्वयादिसें प्रधानमन्त्री खनालं दलत दथुइ सहमति मजुइगु खःसा थःम्हेस्यां राजीनामा बिइगु धयादीगु खः ।
प्रधानमन्त्री खनालया प्रस्तावय् माओवादी नायः प्रचण्ड व कांग्रेस नेता पौडेल सकारात्मक जूगु व शुक्रवाः शीर्ष नेतातय्गु मुँज्या च्वनीगु बालुवाटार श्रोतं न्ह्यथंगु दु ।
प्रधानमन्त्री खनालं दयेकूगु प्रस्तावय् राज्य पुनःर्संरचना लिसेंया विवादीत विषयस लिपा सहलह यायेकथं भदौ १० गते दुने संविधानया प्रारम्भिक मस्यौदा तयार यायेगु व दलत दथुइ चक्रिय प्रणाली अर्न्तगत सहमतिया सरकारया नेतृत्व यायेगु न्ह्यथनातःगु दु ।
