आकासे पुलया विवाद झिंन्यान्हुया दुने ज्यंकेत सरकारयात निर्देशन
व्यवस्थापिका संसदया सार्वजनिक लेखा समितिं स्वनिगःया थीथी थासय् दयेकेत्यंगु आकासे पुलया खँय् खनेदुगु विवाद झिंन्यान्हुया दुने ज्यंकेत सरकारयात निर्देशन बिउगु दु ।
समितिया बिहीवाः च्वंगु मुँज्यां आकासे पुल दयेकेगु निंतिं इनोभेटिभ प्रा.लि.लिसे सम्झौता नापं समितिं थ्वस्वयां न्ह्यःया निर्देशनया लिधंसाय् झिंन्यान्हु दुने क्वःछिइकथं समितियात जानकारी बीत निर्देशन बिउगु खः ।
समितिया मुँज्याय् आकासेपुल दयेकेधुंकाः चक्रपथ विस्तारया निंतिं आकासेपुल स्यंकेगु दक्व जिम्मा इनोभेटिभं व्यहोरे याइगु कथं भौतिक योजना तथा निर्माण मन्त्रालयं क्वःछयूगु जानकारी याकेत नं निर्देशन बिउगु खः ।
भौतिक योजना तथा निर्माण मन्त्री टोपबहादुर रायमाझीं आकासेपुल दयेकीगु कम्पनि कमर्सियल हिसाबं मजूसे लँजुवातय्गु सुविधा व सवारी चाप नियन्त्रणपाखे ध्यान बियाः ज्या यायेत इनाप यानादीगु दु ।
मुँज्याय् अर्थसचिव कृष्णहरि बास्कोटां आकासेपुलयात छुं नं व्यापारिक प्रयोजन स्वयां नं सवारी चापयात म्हो यायेगु संयन्त्रया कथं विकास यायेमाःगु खँय् बः बियादिसें आकासेपुलय् यक्व पसः कवः दयेकूसा उकिं समस्या ब्वलंकीगु पाखे ध्यान बीमाःगु खँ धयादीगु खः ।
