राजनीतिक अवस्था जटिल जुयावनाच्वंगु प्रति राष्ट्रपतिया च्यूताः
राष्ट्रपति डा. रामवरण यादवं देय्या राजनीतिक अवस्था जटिल जुयावनाच्वंगु धासें च्यूताः प्वंकादीगु दु ।
राष्ट्रपति भवन शितल निवासय् बुधवाः सुथय् प्रमुख स्वंगू दलया शीर्ष नेतात नाप खँल्हाबंला यानादिसें राष्ट्रपति यादवं शान्ति प्रक्रिया व संविधान निर्माण यायेगु ज्या लिबानाच्वंगु धासें च्यूताः प्वंकादीगु खः । सुथय् ८ बजे जूगु परामर्शय् प्रधानमन्त्री झलनाथ खनाल, एनेकपा (माओवादी)या नायः पुष्पकमल दाहाल 'प्रचण्ड' व नेपाली कांग्रेसया सभापति सुशील कोइरालाया ब्वति दुगु खः ।
उगु इलय् प्रधानमन्त्री खनालं श्रावन २८ गते दुने शान्ति प्रक्रिया बारे सहमति यायेगु, भदौ १० गते दुने संविधानया न्हापांगु मस्यौदा जारी यायेगु व चक्रिय प्रणाली कथं सरकारया नेतृत्व यायेगु प्रस्ताव न्ह्यब्वयादीगु खः ।
अथेहे माओवादी नायः प्रचण्डं शान्ति व संविधान निर्माणयात थःगु पार्टीया केन्द्रीय मुँज्यां हे पारित यायेधुंकूगुलिं थःपिंत संका मयायेत इनाप यानादिसें २८ गते न्ह्यः हे लडाकुतय् पुर्नवर्गिकरण यायेत माओवादी प्रतिबद्ध दुगु न्ह्यथनादिल ।
कांग्रेस सभापति कोइरालां शान्ति प्रक्रिया व संविधान निर्माणया ज्या न्ह्याकेत पहलकदमी भूमिका म्हितेत माओवादी नायः प्रचण्डयात इनाप यानादिल । वय्कलं प्रधानमन्त्रीं शान्ति प्रक्रियायात न्ह्यकेगु धकाः २८ गतेया ई क्वःछिउगु खँ सकारात्मक जूगु टिप्पणी नं यानादिल ।
संविधानसभाया म्याद लच्छि स्वयां म्हो ई जक ल्यँ दुगु इलय् राष्ट्रपति यादवं गम्भीर जुयाः ईयात ध्यानय् तयाः ज्या न्ह्याकेत स्वम्ह नेतातय्त इनाप यानादीगु खः ।
