'प्रधानमन्त्री खनालं पार्टी परम्परा व पद्धति हाचांगाल'
नेकपा (एमाले)या केन्द्रीय अनुशासन आयोगं पार्टीया नायः नापं प्रधानमन्त्री झलनाथ खनालं पार्टी परम्परा व पद्धति हाचांगाःगु दाबी याःगु दु ।
आयोगया मंगलवाः च्वंगु आकस्मिक मुँज्यां सपथया बारे सहलह यायेत च्वंगु स्थायी समितिया मुँज्या विवादया हुनिं दथुइ हे त्वःताः वंगु हे पार्टी परम्परा व पद्धति हाचांगाःगु खः धकाः क्वःछिउगु दु ।
मुँज्याय् ल्ह्वंगु न्ह्यसःत अनूकुल वा प्रतिकूल न्ह्याग्गु हे जूसां पाय्छि कथं निष्कर्षय् थ्यंकेगु व मुँज्यायात विधिवत कथं क्वचायेकेगु मू जिम्मा धइगु पार्टी नायःया हे जूगु खँ न्ह्यथसें प्रधानमन्त्रीया विशेष अधिकारया नामय् पार्टी नायः नापं प्रधानमन्त्रीपाखें थज्याःगु आवेगपूर्ण अभिव्यक्ति लिसें थः यःथे यानाः मुँज्या त्वःताः वनेगु ज्या पार्टी परम्परा व पद्धति अःखः जूगु खँ धाःसें कुंखिंउगु दु ।
आयोगं मुँज्या जुयाच्वंगु इलय् त्वःताः वनेगु ज्या आवेगपूर्ण व गैर जिम्मेवार जूगु धाःसें पार्टी विधान पद्धति व विधिययात नालाः पार्टीयात जिम्मेवार जुयाः न्ह्याकेत व थजाःगु गल्ति मयायेत नं खनालयात गम्भिर ध्यानआकर्षण याःगु दु ।
अथेहे पार्टीया न्वकु बामदेव गौतमं परिस्थितियात अझ उत्तेजित यायेगु कथंया अभिव्यक्ति बिउगु धाःसें अनुसाशन आयोगं गौतमया नं कुंखिंउसें आवंनिसें थज्याःगु ज्या मयायेत व पार्टीयात क्वातुकेगु निंतिं भूमिका म्हितेत ध्यानआकर्षण याःगु दु ।
देय् गम्भिर संकटया मोडय् लानाच्वंगु धाःसें एमाले अनुशासन आयोगं पार्टी दुनेया विवाद व असमझदारयात कयाः आरोप प्रत्यारोप मयायेत नं नेतातय्त इनाप याःगु दु ।
