शान्ति व संविधानया निंतिं मूलभूत ज्याधलः दयेकेत सरकारयात निद्रेशन
मूमू स्वंगू दलत दथुइ वंगु १४ गते जूगु न्यागू बुँदाया सहमति कार्यनवयन अनुगमन विशेष समितिं छवाःया दुने शान्ति प्रक्रिया व संविधान दयेकेगु निंतिं मूलभूत ज्याधलः दयेकेत सरकारयात निद्रेशन बिउगु दु ।
अथेहे अनुगमन विशेष समितिया मंगलवाः च्वंगु मुँज्यां नेपाली सेनायात समावेशी व लोकतान्त्रीकरण यायेगु खँय् याकन स्वयां याकनं विस्तृत ज्याधलः दयेकेत नं सरकारयात निद्रेशन बिउगु दु । सभामुख सुवास नेम्वाङ कजि जुयादीगु उगु समितिया म्हिगः च्वंगु मुँज्यां माओवादी नेताया सुरक्षाय् दुगु स्वीनिपु ल्वाभः व ल्यंदनीपिं जनसेनायात छवाःया दुने शिविर लितः हयेत धाःगु दु । मुँज्यां माओवादी सेनायात रेखदेख समायोजन व पुनःस्थापन विशेष समितियात थुकथं उजं बिउगु खः ।
माओवादी नायः पुष्पकमल दाहल 'प्रचण्ड' लिसेंया नेतातय्गु सुरक्षा तयातःपिं जनसेना व ल्वाभः शिविर यंकेधुंकूगुसा नं वरिष्ठ न्वकू मोहन वैद्य 'किरण' लिसेंया नेतातय्के दुगु ल्वाभः व जनसेना लित बिउगु मदुनि ।
अथेहे समितिं प्रधानमन्त्रीया राजीनामाया खँय् शान्ति व संविधानया राष्ट्रिय ज्या क्वचायेकेत न्यागू बुँदायात सहमति कार्यान्वयन यायेत प्रधानमन्त्री नापं नेतातय्गु ध्यान आकर्षण याःगु दु ।
