सरकार क्वथलेय्गुलि भारतया ल्हाः मदु : राजन
नेपा:या निंतिं भारतया पुलांम्ह राजदूत केभी राजनं माओवादी नेतृत्वया सरकार क्वथलेगुलि भारतया छुं नं ल्हाः मदुगु खँ धयादीगु दु ।
रिपोटर्स क्लबया साक्षात्कार ज्याझ्वलय् बिहवाः न्ववायेगु झ्वलय् वयेकलं नेपाःया आन्तरिक विवादया कारणं माओवादीया सरकार क्वःदगु धयादिल । वयेकलं नेपालय् न्ह्यामेसिया नेतृत्वय् सरकार गठन जुसां उकी भारतया छुं सरोकार मदइगु खँ धयादिल ।
सेनापतिया विवाद ज्यंकेत भारतया दूत छ्वयाहेयेत प्रधानमन्त्री पुष्पकमल दाहाल प्रचण्डं याःगु इनापयात कयाः संचारकर्मीतय्सं न्यंगू न्ह्यसःलय् वयेकलं समस्या ज्यंकेत नपासं च्वंगु देय् नाप परामर्श कायेगु सामान्य खँ जूगु प्रतिक्रिया बियादिल ।
वर्तमान राजदूत राकेश सुद यक्व हे विवादय् लाःगु बारे न्यंगु न्ह्यसःया लिसःलय् वयेकलं सुं नं भारतीय राजदूतत नेपालय् बिना आलोचना च्वंगु मदु धयादिल । वयेकलं भारतीय राजदूतत नेपाःया राजनीतिक दलया इच्छा पूमवनेवं आलोचनाया पात्र जुइगु धयादिल । दक्वं नेता व दलतय् आकांक्षा छक्वलं पूवंके अपू मजूधुलिं गब्लें सु गब्लें सु तँचाया हे च्वनी धयादिल ।
