'आकासेपुलया नामय् व्यापारिक कम्प्लेक्स दयेकेगु षडयन्त्र’
आकासेपुल मंकाः संघर्ष समितिं येँ महानगरपालिकां आकासेपुलया नामय् व्यापारिक कम्प्लेक्स दयेकेगु षडयन्त्र जुयाच्वंगु द्वपं बिउगु दु ।
येँया थीथी थासय् आकासेपुल दयेकेत इनोभेटिभ ठेकेदार कम्पनीयात झिंच्यादँया निंतिं लीजय् सम्झौता यानाः ज्या न्ह्याकूगु खँय् समितिं असन्तुष्टि प्वंकूसे ज्याय् पंगः थनेगु तकया ख्याच्वः बिउगु दु ।
सोमवाः येँय् पत्रकार सम्मलेन यासें मंकाः संघर्ष समितिं थःपिं आकासेपुलया विरोधी मजूसां चीन सरकारया ग्वाहालिइ सम्झौता जुयाः दयेकेत्यंगु च्यागू लेनया रिंगरोडया ज्या रद्द जुइगु आशंका प्वंकूगु खः ।
मंकाः संघर्ष समितिं येँया अतिकं व्यस्त कलंकी, न्हू बानेश्वर, गोंगःबुँ बसपार्क नपां माछापोखरीइ स्थानीय जनताया सल्लाह हे मकासे करोडौं तकाया चलखेल यासें प्रशासनया लिधंसाय् आकासेपुल दयेकेत्यंगु द्वपं बिउगु दु । आकासेपुल दयेकेज्या बन्द यायेगु लागिं येँ महानगरपालिका, भौतिक योजना तथा निर्माण मन्त्रालय व संविधानसभा भवन घेराउ यायेगु आदि ज्याझ्वः यासें आन्दोलन यायेगु ख्याच्वः तकं बिउगु दु ।
पत्रकार सम्मेलनय् न्ववानादिसें माओवादीया सभासद राजकाजी महर्जनं येँया महत्वपूर्ण चुकय् आकासेपुल दयेकेगु लागि सर्वोच्च अदालतं तकं भ्रष्टतय्त कमेयायेगु धन्दाय् तिबः बीत स्वःगु द्वपं बियादिल ।
अथेहे राष्ट्रिय उपभोक्ता मञ्चया नायः प्रेमलाल महर्जनं रिंगरोड चिबालाः जूगुलिं सरकारं च्यागू लेनया रिंगरोड दयेकेगु धाःधां हे आकासेपुल दयेकेगु ठेक्का बियाः कमिसन नयेगु ग्वसाः दुगु दाबी यानादिल ।
