सपथया विषययात कयाः एमाले दुने ल्वापु
एनेकपा (माओवादी)पाखें प्रस्तावित मन्त्रीतय्त सपथ ग्रहण याकेगु वा मयाकेगु धइगु विषयस नेकपा (एमाले) दुने तच्वकं विवाद जूगू दु ।
पार्टी नायः तकं जुयादीम्ह प्रधानमन्त्री खनालया माओवादी मन्त्रीतय्त सपथ ग्रहण याकेगु अडान लिपा उगु विषयस एमाले स्थायी समितिया दुजःत दथुइ मत विभाजित जूगु खः ।
माओवादीया कट्टर आलोचक केपी शर्मा ओली लिसेंया छुं स्थायी समितिया दुजःत न्हूपिं मन्त्रीतय्त सपथ ग्रहण याकेमजिउगु पक्षय् कडा रूपं प्रस्तुत जूगु खःसा खनाल पक्षीय स्थायी समितिया दुजःतयसं सरकारय् मन्त्रीइ छ्वयेगु माओवादीया क्वःछिना व प्रधानमन्त्रीया विशेष आधिकारयात कयाः हस्तक्षेप याये मजिउगु तर्क न्ह्यःने हःगु स्रोतं न्ह्यथंगु दु ।
स्थायी समितिया मुज्याय् न्वकू बामदेव गौतमं नायलं प्रधामन्त्रीया ल्याखं काइगु क्वःछिना हे अन्तिम जुइगु धाःगु खँयात कयाः ओली-नेपाल पक्ष तसकं आक्रोसित जूगु खः । मुँज्याय् प्रधानमन्त्री खनालं नं थः पार्टीया नायः व प्रधानमन्त्रीया हैसियतं क्वःछिइ फइगु अडान लिपा एमाले दुने जुयाच्वंगु विवादं न्हूगु कथं न्ह्याः वंगु खः ।
मुँज्याय् ओली-नेपाल पक्षं सपथ ग्रहणा याकेगु ज्या लिछ्यायेगु धकाः माइन्युत च्वकेत स्वयेवं प्रधानमन्त्री खनालं मुँज्या त्वःता न्हूपिं मन्त्रीतय्त सपथ ग्रहणा याकेत बल्खुं पिहांवंगु खः ।
सपथ ग्रहणया बारे मेगु सहलह यायेत वइगु साउन २१ गते केन्द्रीय समिति मुँज्या सःतेगु खँय् सहमति जूगु खँ सीदुगु दु ।
