प्रधानमन्त्रीपाखें झिम्ह न्हूपिं मन्त्रीतय्त सथप ग्रहण याकल
तच्वःगु विवादया दथुइ प्रधानमन्त्री झलनाथ खनालं थौं झिम्ह न्हूपिं मन्त्रीतय्त सपथ ग्रहण याकूगु दु । नेपाली कांग्रेस व स्वयम थःगु पार्टी दुनेपाखें वयाच्वंगु दबावया दथुइ प्रधानमन्त्री खनालं न्हूपिं मन्त्रीतय्त सपथ ग्रहण याकूगु खः ।
राष्ट्रपति डा. रामवरण यादवया उपस्थितिइ थौं सनिलय् प्रधानमन्त्री खनालं माओवादीया गुम्ह व मधेशी जनअधिकार फोरामया छम्ह न्हूपिं मन्त्रीतय्त सपथ ग्रहण याकूगु खः । सपथ ग्रहण ज्याझ्वः सनिलय् ५ बजे हे यायेगु क्वःछिनातःगु खःसां एमालेया आकस्मिक स्थायी कमिटीया मुँज्या च्वनेवं सपथ ग्रहण ज्याझ्वः १ घण्टा लिपा जक सम्भव जूगु खः ।
एमाले स्थायी कमिटी मुँज्यां सपथ ग्रहण ज्याझ्वः लिछ्यायेत प्रधानमन्त्रीयात इनाप याःगु खःसां प्रधानमन्त्री खनालं 'जिं सथप ग्रहण याके' धासें बल्खुं तप्यंक राष्ट्रपति भवन शितल निवस थ्यंकूगु खः ।
माओवादीपाखें थौं नारायणकाजी श्रेष्ठ (उपप्रधान तथा गृह),पोस्टबहादुर बोगटी (सञ्चार),पम्फा भुसाल (शान्ति),लोकेन्द्र विष्ट मगर (स्वास्थ्य),हिसिला यमी (भूमिसुधार),महेन्द्र पासवान (उद्योग), जयपरी घर्ती (महिला, बालबालिका), लेखराज भट्ट (विज्ञान तथा प्रविधि) व ओनसरी घर्ती (खेलकुद)यात सपथ ग्रहण याःगु खः । अथेहे फोरमपाखें विजय यादव (वाणिज्य तथा आपूर्ति)यात नं प्रधानमन्त्रीं सथप ग्रहण याकादीगु खः ।
