प्रमपाखें माओवादीया न्हूपिं मन्त्रीतय् सपथ नकीगु संकेत
प्रधानमन्त्री झलनाथ खनालं माओवादीया न्हूपिं मन्त्रीतय्त सपथ ग्रहण याकीगु संकेत बियादीगु दु ।
माओवादी नायः पुष्पकमल दाहाल 'प्रचण्डं' याःगु पत्रकार सम्मेलन लिपा प्रधानमन्त्री निवास बालुवाटारय् बिस्कं पत्रकार सम्मेलन यानादिसें प्रधानमन्त्री खनालं उगु संकेत बियादीगु खः । वय्कलं थःम्हं माओवादीया न्हूपिं मन्त्रीतय्त सपथ ग्रहण याकेत अस्वीकार मयानागु दाबी तकं यानादिल ।
माओवादीं न्ह्यब्वःगु मन्त्रीतय् ल्याः व परिपेक्ष्यय् जक सपथ ग्रहण जुइमफुगु धयादिसें न्हूपिं मन्त्रीतय् ल्याः म्हो यायेत माओवादीनाप तःक्व हे सहलह जुइधुंकूगु व आः नं सहलह जुयाच्वंगु जानकारी बियादिल ।
पत्रकार सम्मेलनय् वय्कलं सुयात सपथ ग्रहण याकेगु व सुयात मयोकेगु खँ स्थायी कमिटीया सरोकार मजूगु धयादिसें सपथ ग्रहणया विशेषाधिकार प्रधानमन्त्रीइ निहीत जूगु स्पष्ट यानादिल । वय्कलं एमालेया स्थायी कमिटीं माओवादीया न्हूपिं मन्त्रीतय्त सपथ ग्रहण मयाकेत निर्णय मयागु दावी तकं यानादिल ।
वय्कलं माओवादी नायः प्रचण्डं याःगु पत्रकार सम्मेलनय् शान्ति प्रक्रिया, संविधान निर्माण व सेना समायोजनप्रति प्वंकूगु प्रतिबद्धतायात सकारात्मक जूगु टिप्पणी नं यानादिल ।
News Location:
