माओवादीं सरकारयात बिउगु समर्थन तत्काल लितमकाइगु
एकीकृत नेकपा (माओवादीं) झलनाथ खनाल नेतृत्वया सरकारयात बिउगु समर्थन तत्काल लितमकाइगु जूगु दु ।
खनाल नेतृत्वया सरकारय् ब्वति कयाच्वंपिं फुक्कं माओवादी मन्त्रीतय्सं राजीनामा बियाः न्हूपिं मन्त्रीतय्त सपथ ग्रहण याकेत थौं तकया अल्टिमेटम बिउगु माओवादीं थौं हे छगू पत्रकार सम्मेलन यानाः तत्काल समर्थन लितमकायेगु घोषणा याःगु खः ।
माओवादीं थःगु पार्टी मुख्यालय कोटेश्वर पेरिस डाँडाय् याःगु पत्रकार सम्मेलनय् नायः पुष्पकमल दाहाल 'प्रचण्डं' माओवादी मन्त्रीतय्सं राजीनामा याःगु अर्थ समर्थन लितकाःगु मखुगु धयादिल । वय्कलं माओवादीपाखें जुइपिं न्हूपिं मन्त्रीतय्त सपथ ग्रहण याकेगु विषलय् प्रधानमन्त्री खनालनाप सकारात्मक रुपं सहलह जुयाच्वंगु धयादिल ।
माओवादी शान्ति प्रक्रिया, संविधान निर्माण नापं न्यागू बुँदे सहमति प्रति प्रष्ट जूगु धयादिसें न्हूपिं मन्त्रीतय्त सपथ याकूगु नीप्यघौ दुने हे न्हूगु राष्ट्रिय सहमतिय सरकार निर्माण यायेफइगु धयादिल ।
अथेहे उगु पत्रकार सम्मेलनय् माओवादी सेना समायोजन प्रति प्रतिबद्ध दुगु जानकारी बिउसें नायः प्रचण्डं भदौ १४ दुने लडाकु पुनर्वर्गिकरण व संविधानया न्हापांगु मस्यौदा जारी यायेगु प्रस्ताव नं तयादीगु खः ।
News Location:
