यलय् हाइकु साहित्य बारे सहलह
प्रतिभा समाजया साधारण सभा नापं प्रतिभा बुक बैंकया दँमुँज्या व सातोओकि इता स्मृति दिवसया लसताय् नःलि नेपालभाषा साहित्यिक पत्रिकाया ग्वहालिं थौं जापानी हाइकु साहित्यया बारे सहलह व हाइकु कवितां न्यनेब्वने ज्याझ्वः जुल ।
समाजया नायः भाजु पद्मरत्न तुलाधरया सभाध्यक्षताय् जूगु उगु ज्याझ्वलय् हाइजिनिपं जनकवि दुर्गालाल श्रेष्ठ, ईश्वरीमैंया श्रेष्ठ, तुयु पुं, बुद्ध नेवाः, मोक्ष बहादुर अमात्य, रासा, डा. बज्रराज शाक्य, विजयरत्न असंबरे, बद्री वेदना, शाक्य सुरेन, महेश लँजुवाः, सौरभ शाक्य, विमल ताम्रकार व भूषण प्रसाद श्रेष्ठपिन्सं थःथःगु हाइकु ब्वना न्यंकादीगु खः ।
ज्याझ्वलय् समाजया न्वकू प्रा.डा. बज्रराज शाक्यं लसकुस यानादीगु खःसा हाइकु छु खः ? गथे जुइमाः धइगु बारे भूषण प्रसाद श्रेष्ठं व हाइकु व विम्वया स्वापूया बारे प्रा. नर्मदेश्वर प्रधानं नुगः खँ प्वंकादीगु खः ।
थिनं १९दँ न्ह्यः नेपाः वःम्ह १६ दँया जापानी मचा थाइ एअरवेज दुर्घटनाय् लानाः मदुगुलिं वया मां अबु व थःथितिपिन्सं वया लुमन्तिइ छेँ दनाः दँय्दसं थुकथं लुमन्ति न्हि हनेगु झ्वलय् थुगुसी हाइकु न्यनेब्वने ज्याझ्वः याःगु खः ।
ज्याझ्वलय् सुभाय् देछायेगु झ्वलय् समाजया छयांजे किरण नरिसंह शाक्यं सातोआकि इतोया अबुं च्वयादीगु जापानी भाषाया हाइकु ब्वनाः उकियात नेपालभाषां भावानुवाद यानादीगु खः ।
