आप्पा शेर्पा पाखें न्हूगु रेकर्ड
आप्पा शेर्पां सगरमाथाया च्वकाय् झिंगुक्वःगु खुशी थ्यंकाः न्हूगु रेकर्ड कायम यानादीगु दु । विश्वया सर्वोच्च शिखर सगरमाथाया च्वकाय् शेर्पां थ्वस्वयां न्ह्य: झिंच्यक्वः तक थ्यकां रेकर्ड तयादीगु खः । शेर्पां थःगु हे रेकर्डयात त्वाथलाः न्हूगु रेकर्ड कायम यानादीगु खः ।
बिहिवाः सुथय् सगरमाथाया च्वकाय् थ्यंकाः शेर्पा थ्व रेकर्ड कायम यानादीगु खः । वयेकलं थ्वस्वयां दच्छि न्ह्यः २००८ मे २२या न्हि कुन्हु झिंच्याक्वःगु खुशी सगमाथाया सफल आरोहण यानादीगु खः ।
शेर्पा थौं सुथय् च्यताः ईलय् सथरमाथाया च्वकाय् थ्यंकाः इको एभरेष्ट एक्सपिडिसन्सया बेस क्याम्प म्यानेजर दावा शेर्पायात फोन यानाः थः च्वकाय् थ्यंगु जानकारी बियादीगु खः । वयेकलं, - 'जी च्वकाय् थ्यन । जिं आ: थन आरोहीतय्सं ब्वयेकातःगु धार्मिक ध्वाँय्त खनाच्वनाः । जिं द्यःतय्त लय्ताय्काः व 'भूम्पा' यात च्वकाय् छानाः' धकाः एभरेष्ट एक्सपिडिसन्सया बेस क्याम्प म्यानेजर दावा शेर्पा धयादीगु खः ।
अप्पां सन् १९९०य् सगरमाथाया न्हापांगु खुशी आरोहण यानादीगु खः । इको एभरेष्ट एक्सपिडिसन्स - २००९या पुचःया दुजः आप्पां जलवायु परिवर्तनं लाकीगु लिच्वःया बारे जानकारी ब्वलंकेत थुगु खुशी सगरमाथाया आरोहण यानादीगु खः । वयेकलं थौं सुथय् सगरमाथाया च्वकाय् 'जलवायु परिवर्तन दिके - हिमालय बचे याये' धकाः च्वयातःगु ध्वाँय् अन च्वकाये ब्वयेकादीगु खः ।
