संघर्ष लाइनया कारण पार्टी तज्याइमखु : किरण
एकीकृत नेकपा माओवादीया न्वकु मोहन वैद्य किरणं पार्टीदुनेया निगू लाइन संघर्षं पार्टी तज्याइ धइगु हल्ला निराधार जूगु धयादिल । अखिल क्रान्तिकारीया विद्यार्थी प्रशान्त वलीपाखें च्वयादीगु राजनीतिक पाइलाहरु नांया सफू म्हिगः येँय् उलेज्या यानादिसें वय्कलं पार्टी तमज्याइगु दाबी यानादिल ।
वर्ग संघर्ष जटिल दुगु कारणं हे पार्टीइ अन्तर संघर्ष न्ह्यानाच्वंगु नेता किरणं धयादिल । शान्ति प्रकि्रया व संविधान निर्माणयात न्ह्यःने न्ह्याकेत व जनताया संविधान निर्माण यायेगु नितिं अन्तर संघर्ष न्ह्याकूगु वय्कःया धापू खः ।
अथेहे म्हिगः हे जनसाचार अभियानय् साचारकर्मीतलिसे खँल्हानादिसें माओवादी वरिष्ठ नेता किरणं वंगु जेठ १४ गते जूगु न्यागू बुँदे सहमति कार्यान्वयन यायेत थःपिं प्रतिबद्ध दुगु व लिपांगु इलय्तक्क नं सहमतिया कुतः न्ह्याकाः च्वनेगु धयादिल ।
सरकारय् छ्वयेगु निर्णय पार्टीया लिपांगु निर्णय जुइगु जुयाः थुकिया बारे मेिपंसं विवाद यायेगुया औचित्य मजुइगु वय्कःया धापू खः । सरकार पुनर्गठनया नितिं दलत सकारात्मक जुइगुलिइ थःपिं अझ आशावादी दुगु धासें वय्कलं लिपाथ्यंकं सहमतिया कुतः न्ह्यानाः च्वनीगु धयादिल ।
