आःया प्रधानमन्त्री बाबुराम भट्टराई : मन्त्री रायमाझी, शपथ याकूसा प्रधानमन्त्रीयात कारबाही : रावल
माओवादी नेता लिसे भौतिक योजना व निर्माण मन्त्री टोपबहादुर रायमाझीं लच्छियादुने शान्ति व संविधानलिसे राष्ट्रिय सहमतिया सरकार दयेकीगु दाबी यानादिसें उकिया नेतृत्व बाबुराम भट्टराईं हे याइगु दाबी यानादीगु दु । अथे जूसा शान्ति व संविधान निर्माणया ज्या नं सहज जुइगु दाबी वय्कलं यानादिल । सहमति याःगु स्वंगू दल माओवादी कांग्रेस व एमालें हे न्यागू बुँदे सहमति कार्यान्वयनय् उदासीनता क्यंगु धयादिसें न्यागू बुँदे सहमति कार्यान्वयन यानाः निकास पिकायेगु माःगु नं वय्कलं बः नापं बियादीगु दु ।
वय्कलं राष्ट्रिय सहमतिया विकल्प मदुगु धयादिसें सहमतिया नितिं प्रधान मन्त्रीं न्हापा हे राजीनामा बियाः मार्ग प्रशस्त यायेबलय् जुइगु धयादिल । रिपोर्टस क्लबय् वय्कलं धयादी - सहमति जुइगु खःसा न्हापा वा लिपा न्ह्याःगु इलय् नं प्रधानमन्त्रीं राजीनामा ब्यूसां ज्यू धयादिल । उिकं छु नं फरक जुइमखु । नेकपा एमालेया नेता भीम रावलं धाःसा पार्टीया निर्णय अःखः प्रधानमन्त्री झलनाथ खनालं माओवादी मन्त्रीतय्गु सपथ याकूसा वय्कःयात हे कारबाही जुइगु ख्याच्वः नापं वय्कलं बियादीगु दु ।
वय्कलं देय् ज्यामिछंगु अवस्थाय् दुगु व सहमति कायम यानाः न्ह्यःने न्ह्यायेमाःगु इलय् मन्त्री परिषद् पुनर्गठनं सहमतियात पंगः थनीगु धयादिसें छु नं हालतय् सपथ मजुइगु बरु प्रधानमन्त्रीं राजीनामा बियाः सहमतिया निितं मार्ग प्रशस्त यायेत नापं वय्कलं स्पष्ट यानादिल ।
वय्कलं आः मन्त्री परिषद्या पुनर्गठन स्वयाः नं शान्ति व संविधान निर्माणया ज्या न्ह्यःने न्ह्याकाः माओवादीं सरकारया नेतृत्व यायेमाःगु खँय् बहः बियादिसें शान्ति प्रकि्रया न्ह्यःने मन्ह्यात्तले माओवादीं छु नं हालतय् सरकारया नेतृत्व यायेमफइगु दाबी नापं यानादिल ।
अथेहे वय्कलं शान्ति प्रकि्रया न्ह्यःने न्ह्याइगु धिसिलाःगु आधार मदयेकं मन्त्री परिषद् हिलाबुला जुइ हे मफइगु नापं जानकारी बियादीगु खः । न्यागू बुँदे सहमति कार्यान्वयनया मुद्दा आः देय्या नितिं मदयेकं मगाःगु धयादिसें सरकार विस्तारया खँ म्वाःमदुगु विषय जूगु नापं दाबी यानादीगु खः ।
