माओवादी केन्द्रीय समितिया निर्णय सार्वजनिक
एकीकृत नेकपा माओवादीं थ्व स्वयाः न्ह्यः च्वंगु पार्टी केन्द्रीय समिति वैठकया निर्णयत थौं सार्वजनिक याःगु दु । नायः पुष्पकमल दाहाल प्रचण्डं विज्ञप्ती पिकयाः पार्टीया तत्कालिन कार्ययोजनाया सम्बन्धय् शीर्षकया प्रस्ताव छुं संशोधन व परिमार्जनलिसे पारित जूगु न्ह्यःथंगु दु ।
अथेहे न्हापाया मतभिन्नतात कायम हे जुइगु नं विज्ञप्तीइ न्ह्यःथनातःगु खः । विज्ञप्तीइ शान्ति संविधान व सहमतीय सरकारया निति मेमेगु पक्षलिसे परिणाममुखी वार्ता यायेगु अग्रगामी निकासलिसेया शान्ति जनताया संविधान लिसे आपालं हिउपाःया निति सतकपाखें जनदवाब सृष्टि यायेत भदौ महिनापाखें कार्यतालिका दयेकाः प्रभावकारी रुपय् जनपरिचालनया अभियान न्ह्याकेगु खँयात बहः ब्यूगु दु ।
पार्टीइ एकता व विश्वासया निति दयेकूगु आचार संहिता याकनं लागू यायेगु भदौया न्हापांगु वाःतक्क राज्यस्तरीय प्रशिक्षण यायेगु पार्टीया मतभेद व वैचारीक बहस क्वःछीत महाधिवेशनय् वनेगु व उकिया निति भदौ १४ गतेलिपा च्वनीगु केन्द्रीय समितिया बैठकं निर्णय कायेगु माओवादीं जानकारी ब्यूगु खः । पार्टीया आर्थिक आय-व्यय लिसे स्रोत साधनया सामुहिक व्यवस्थापन याकनं लेखा विभागयात लःल्हायेगु व भदौ १४ गतेतक्कया कार्ययोजनायात स्थायी समिति बैठकपाखें मूर्त यायेगु नं विज्ञप्तीइ न्ह्यःथनातःगु दु ।
