शम्भु भारती नाप १५करोड धरौटी माग
सुडान घोटला काण्डय् भ्रष्टाचारया द्वपं लाम्ह ठेकेदार शम्भु भारतीनाप विशेष अदालतं १५करोड धरौटी माग याःगु दु ।
प्यन्हु न्ह्यः निसें बयान कायेगु झ्वलय् न्यायिक हिरासतय् दुम्ह भारतीयात थौं विशेष अदालतया न्यायाधीशत गौरीबहादुर कार्की व दुजः न्ययाधीशत ओमप्रकाश मिश्र व केदारप्रसाद चालिसेया मंकाः इजलासं भारतीयात दोषी ठहर यासें उगु धरौटी माग याःगु दु । धरौटी बुझे याये मफुसा भारतीयात सदर कारागार डिल्लीबजार चलान याइ ।
शान्ति स्थापनार्थ सुडानय् खटे जुयाच्वंपिं प्रहरीतय् निंतिं एपीसी (आर्मर्ड पस्रनल क्यारयिर) लगायत सामान छ्वःगु बापत थःत निगू प्रतिशत कमिशन वइगु सहमति जूगु खँ भारतीं स्वीकार याःगु खः । भारती एपीसी स्पलाइ याइगु बेलायतया कम्पनी एस्योर्ड रिस्क लिमिटेडया निंतिं नेपाःया एजेण्ट नापं भगवती ट्रेडस्रया मालिक खः ।
भारतीं सुडान घोटालाय् कांग्रेस नेतृ सुजाता कोइारालया जिलाजं रुबेल चौधरी व माइकल राइडरं थःत फसे याःगु बयान तकं बिउगु दु ।
