लच्छि लिपा उपसमितिया मुँज्या
संविधानसभाय् खनेदुगु विवाद ज्यंकेत नीस्वंगु विवाद समाधान उपसमितिया मुँज्यां थौं लच्छि लिपा च्वंगु दु ।
संविधानसभाया म्याद लच्छि जक ल्यँ दुगु इलय् च्वंगु उपसमितिया मुँज्यां समितियात सक्रिय यानाः विवाद म्हो यायेगु निर्णय याःगु दु । थौं सुथय् सिंहदरवारय् च्वंगु मुँज्या विशेष यानाः विवादित मुद्दातय्त गुकथं म्हो यानाः यंकेगु विषयलय् केन्द्रीत जूगु खः ।
मुँज्यां आः वइगु आइतवाः च्वनीगु समितिया मेगू मुँज्याय् विवादित मुद्दाय् सहमति यानाः न्ह्याः वनीगु सहमति याःगु दु । मुँज्या लिपा समितिया संयोजक पुष्पकमल दाहाल 'प्रचण्डं' राज्य पुनसंरचनाया बारे आयोग गठन यायेगु वा मयायेगु खँय् मुख्य विवाद दुगु कनादिल । नेपाली कांग्रेसं अझ नं राज्य पुनस्रंरचना आयोग नीस्वने माःगु अडान मुँज्याय् कयाच्वंगु दु ।
समितिया दुजः नापं कांग्रेस संसदीय दलया नेता रामचन्द्र पौडेलं शान्ति प्रक्रिया पूमवंकं संविधान निर्माण जुइमफइगु धयादिसें शान्ति प्रक्रियायात याकन क्वचायेकेमाःगु धयादिल ।
संविधान निर्माणया झ्वलय् खनेदुगु निसः स्वयां अप्व विवादित बिषययात थुगु समिति सहमतिं यायेधुंकूगु दुसाः आः शासकीय स्वरुप, निर्वाचन प्रणाली व राज्य पुनस्रंरचना सम्बन्धी २७गू विषयलय् जक सहमति जुइ ल्यँ दनी ।
News Location:
