नर्सिङ कलेज थौंनिसें बन्द
अखिल क्रान्तिकारीं नर्सिङ कलेजं थःगु शुल्क क्वःमकाःसा शुक्रवाःनिसें जुइगु नर्सिङया प्रवेशिका परिक्षा पनेगु धाःगु दु । शुल्क म्हो यायेत माग यासें क्रान्तिकारीं सानोथिमिस्थित सीटीइभिटीइ तालं नापं ग्वयाः ब्यूगु खः ।
नर्सिङ कलेजं थःयत्थे शुल्क वृद्धि याःगु विरोधय् विहीवाः सीटीइभिटीइ च्वंगु क्रान्तिकारी व सीटीइभिटीया पदाधिकारीया वार्ता सहमतिइ मथ्यंगुलिं अखिल क्रान्तिकारीं न्वकु व दुजः छ्याञ्जेया कार्यकक्ष लिसे परीक्षा शाखाय् तालं ग्वयाः ब्यूगु खः । क्रान्तिकारीया नायः हिमाल शर्मां कलेजं कयाः वयाच्वंगु पुलांगु शुल्क यथावत् तयाः वैज्ञानिक तवरं शुल्क निर्धारण यायेमाःगु धासें अथे मयासे जबर्जस्ति परीक्षा कायेत स्वःसा कडा आन्दोलन यायेगु ख्याच्वः नापं बियादिल । सीटीइभिटीया दुजः छ्याञ्जे जयबहादुर टण्डनं धाःसा अनुगमन समिति नीस्वना मनोमानी शुल्क काःपिंत कारबाहीया दायराय् हयेगु व शुल्क निर्धारणया नितिं समिति नीस्वनेगुलिइ मेमेगु विद्यार्थी संगठनलिसे सहमति जूगु जानकारी ब्यूसें क्रान्तिकारी विद्यार्थीलिसे नं सहमति जुइगु जानकारी बियादिल ।
थ्व स्वयाः न्ह्यः हे सीटीइभिटीइ थीथी माग तयाः फार्मेसीया विद्यार्थीं तालं ग्वयाः वयाच्वंगु खः । अथेहे झिंखुगू बुँदे माग न्ह्यःने न्ह्याकूसें नेपाल विद्यार्थी संघं सीटीईभिटीइ आन्दोलनया घोषणा याःगु दु । संघं विहीवाः पत्रकार सम्मेलन यानाः शुक्रवाःनिसें अनिश्चितकालिन तालाबन्दी लिसेया आन्दोलनया घोषणा याःगु खः ।
