वीपी प्रतिष्ठानय् आन्दोलन, क्यान्सर अस्पतालया विरोध ज्याझ्वः स्थगित
प्रशासनया कमजोरीया कारण विद्यार्थीं आत्महत्या याःगु धासें आक्रोसित धरानस्थित वीपी कोइराला स्वास्थ्य विज्ञान प्रतिष्ठानया विद्यार्थीतय्सं अस्पतालया डेन्टल डिपार्टय् तालं ग्वयेगु ज्यायात विहीवाः नं निरन्तरता ब्यूगु दु । आन्दोलित विद्यार्थीतय्सं दोषीदथुइ कारवाही यायेमाःगु माग यानाः डेन्टल डिपार्टय् बुधवाःनिसें अनिश्चितकालिन तालाबन्दी याःगु खः ।
परिक्षाया नितिं माःगु उपस्थिति मगाःगु धासें परिक्षा बिइगुपाखें बिाचत यायेवं विडिएस निगूगु दँया विद्यार्थी श्रीकान्त डंगोलं निन्हु न्ह्यः आत्महत्या याःगु खः । विद्यार्थीतय्गु आन्दोलनप्रति अखिल क्रान्तिकारीं ऐक्यबद्धता प्वंकुसें दोषीयात कारबाही यायेत माग नापं याःगु दु । थ्वहे दथुइ अस्पतालया कर्मचारीयात दायेवं बीपी कोइराला मेमोरीयल क्यान्सर अस्पतालया कर्मचारीतय्सं बिरोधया फुक्क ज्याझ्वः स्थगित याःगु दु । कर्मचारीतय्त आक्रमण याःम्ह दोषीयात कारबाही यायेगु आश्वासन दयेवं तत्कालया नितिं बिरोधया ज्याभुवः स्थगित याःगु स्वास्थकर्मी संघया छ्याञ्जे रमेश पाण्डें जानकारी बियादिल । दोषीयात कारबाही मजूसा हाकनं आन्दोलन यायेगु छ्याञ्जे पाण्डें ख्याच्वः बियादिल ।
वंगु आइतबाः अस्पतालया लेखा अधिकृत पिताम्बर आचार्ययात अज्ञात समूहं दायाः घाःपाः यानाब्यूगु विरोधय् कर्मचारीतय्सं अस्पताल प्रशासनय् धर्ना लिसे ल्हातय् हाकुगु कापः चिनाः ज्या यानाः वयाच्वंगु खः ।
