प्रधानमन्त्रीं थौं संसदय् संबोधन याइगु
काम चलाउ सरकारया प्रधानमन्त्री पुष्पकमल दाहाल प्रचण्डं बिहिवाः च्वनीगु संसदया बैठकय् संम्बोधन याइगु जूगु दु ।
ताः ई न्ह्यः निसें माओवादीया सभासदतय्सं अवरुद्ध यानावयाच्वंगु संसद सुचारु यायेत व संविधान मस्यौदा लःल्हायेगु खँय् प्रधानमन्त्री निवास बालुवाटारय् बिहिवाः सुथय् च्वंगु माओवादी सचिवालय व संविधान मस्यौदा समितिया बैठकं प्रधानमन्त्रीं संसदय् सम्बोधन यानाः न्हूगु सरकार गठन व सदन सुचारु यायेगु निर्णय या:गु ख: ।
एकीकृत माओवादी संविधानसभा दलया उपनेता नारयणकाजी श्रेष्ठया कथं संकल्प प्रस्तावया खँय् सहलह जूइगु खँय् विश्वस्त जूगु धयादिल । अथेहे वयेकलं थ्वहे जेठ ८ गते तक संवैधाजिक समितियात संविधानसभा सुझाव मस्यौदा लःल्हायेमाःगु ई जूगुलिं थःपिसं मस्यौदायात गुकथं न्हूगु संविधान निर्माणय् यंकेगु बारे थौंया बैठकय् सहलह जूगु धयादिल ।
