कांग्रेसं थौंया संसद मुँज्या नं अवरुद्ध
प्रमुख प्रतिपक्षी दल नेपाली कांग्रेसं थौं नं प्रधानमन्त्री झलनाथ खनालया राजीनामा माग यासें व्यवस्थापिका संसदया मुँज्या अवरुद्ध याःगु दु ।
संसदया मुँज्या सुरु जुइवं कांग्रेस नेता डा. मिनेन्द्र रिजालं न्ववानादिसें वर्तमान सरकारं शान्ति व संविधान निर्माण पूवंकेगु पाखे ध्यान मबिउसें सहमतिय प्रक्रिया छखे लाकेत स्वःगु द्वपं बियादिल । वय्कलं न्वावयेधुंकाः कांग्रेस प्रमुख सचेतक लक्ष्मण घिमिरें प्रमुख स्वंगू दलत दथुइ जूगु न्यागू बुँदे सहमति कार्यान्वयन याकेगु निंतिं कांग्रेसं संसदया मुँज्या अवरोध यानागु जानकारी बियादिल ।
कांग्रेसं संसदया मुँज्या न्ह्याके मबिइवं सभामुख सुभाषचन्द्र नेम्वाङं थौंया दक्वं नियमित ज्याझ्वः लिछ्यानाः साउन १५ गते तकया निंतिं संसदया मुँज्या स्थगित यानादिल । कांग्रेसं प्रधानमन्त्री खनालया राजीनामा फ्वनाः संसद्या मुँज्या अवरुद्ध याःगु थ्व प्यक्वःगु खुसीइ खः ।
