सुडान घोटाला काण्डया बिचौलीय ठेकेदार न्यायिक हिरासतय्
तसकं बय्बय् जूगु सुडान घोटाला काण्डय् भ्रष्टाचारया द्वपं लाम्ह बिचौलीय ठेकेदार शम्भु भारतीयात विशेष अदालतं न्यायिक हिरासतय् छ्वगु दु । बयानलिपा बहस क्वमचागुलिं भारतीयात हिरासतय् छ्वगु ख ।
थ्व स्वयां न्ह्य पुलापिं आइजीपि ओमविक्रम राणाया नं बहस क्वमचायेवं आइतवाः न्यायिक हिरासतय् छ्वगु खः । लिपा सोमवाः बहस क्वचायेवं अदालतं झिंन्यागु करोड तका धरौटी तय्त उजं बिइवं बुझय् यायेमफया मंगलवाः नं जेलय् हे लागु खः ।
नेपाली सेना व प्रहरीया निंतिं ल्वाभ लगायत बन्दोबस्तीया ज्वलंत आपूर्ति याम्ह बिचौलीय ठेकेदार भारतीयात सुडानय् प्रहरीया नितिं एपीसी लगायतया ज्वलं न्याबलय् भ्रष्टाचार यागु द्वपं लाःगु ख । उम्ह मनुखं बेलायतस्थित स्मार्ट रिक्स नांया कम्पनीया स्थानीय एजेण्ट जुया प्रहरीयात ज्याख्यलय् हे मदुगु ज्वलंत न्याकुगु खः ।
करिब पीप्यंगु करोडया ज्वलं न्याबलय् नीगुंगू करोड भ्रष्टाचार जुगु दाबी अख्तियार दुरुपयोग अनुसन्धान आयोगं याःगु दु । उगु धेबा भ्रष्टाचार याःगु द्वपनय् स्वीप्यम्ह बहालवाल व पुलापिं प्रहरी अधिकारीलिसे निम्ह ठेकेदार मध्ये छम्ह भारती व मेम्ह छम्ह स्मार्ट रिस्कया अधिकारीयात नापं विपक्षी दयेका विशेष अदालतय् मुद्दा दायर याःगु खः ।
भ्रष्टाचारया मुद्दाय् थुकथं गैर सरकारी व्यक्ति ठेकेदार लाःगु सम्भवत थ्व न्हापांगु घटना खः ।
