माओवादीं मन्त्रिपरिषद पुनर्गठनबारे निर्णय कायेत प्रमयात अल्टिमेटम
एकीकृत नेकपा (माओवादीं) मन्त्रिपरिषद पुनर्गठनबारे निर्णय कायेत प्रधानमन्त्री झलनाथ खनालयात झिंप्यघौया अल्टिमेटम ब्यूगु दु । प्रधानमन्त्री ज्याकु सिंहदरबारय् थौं सनिलय् जूगु सहलहसं माओवादीं मन्त्रिपरिषद पुनर्गठन यायेगु मयायेगु बारे कन्हय् सुथय् च्याता ईतक्कया दुने निर्णय कायेत इनाप याःगु खः ।
सहलहसं एमाले व माओवादीं थःथःगु हे अडान कायम तयेवं छु नं सहमति जुइमफुत । सरकारय् सुयात मन्त्री दयेकेगु धइगु विषय पार्टीया आन्तरिक मामिला जूगु धासें माओवादीं मन्त्रीत परिर्वतन यायेगु निर्णय कार्यान्वयन जुइमाःगु अडान तःगु दु । एमालें धासा मन्त्रिपरिषद पुनर्गठन यायेवलय् न्यागू बुँदे सहमति कार्यान्वयनय् शंका पिज्वइगु खँ न्ह्यथंगु दु । बैठकय् निगूलिं दलया शीर्ष नेतातय्गु ब्वति दुगु खः ।
