माओवादी वैठक क्वचाल, संशोधन सहित नायः प्रचण्डया प्रस्ताव पारित
एकिकृत ने क पा माओवादीया केन्द्रीय समिति वैठकं नायः पुष्प कमल दाहाल प्रचण्डया कार्य योजनाया प्रस्ताव संशोधनलिसे पारित याःगु दु । थौं क्वचागु वैठकय् नाय प्रचण्डया शान्ती व संविधान सम्वन्धी कार्य योजनाया प्रस्तावय् छुं सशोधन लिसे सर्वसम्मतिं पारित याःगु केन्द्रीय दुज महेश्वर दाहालं जानकारी बियादिल ।
संशोधनय् दोहोरो सुरक्षा प्रणाली अन्त्यया नितिं वैकल्पिक व्यवस्थाया ग्यारेण्टी जुइमागु व सम्मान जनक ढंगं सेना समायोजन जुइमागु विषययात न्ह्यथनातगु दु । जनमुक्ति सेनाया सन्दर्भय् इकाइ विशेषय् समायोजन यायेमागु ल्वाभलिसे समायोजनया प्रकृयाय् यंकेमागु व राष्ट्रिय सुरक्षा नीति निर्माण यायेमागु खँयात संशोधित कार्य योजनाया प्रस्तावय् कघागु दु । भदौ १४ तकया नितिं तयार यानातःगु कार्य योजनाया प्रस्तावय् सेना व संविधानया सवालय् छुं परिमार्जनलिपा माओवादीदुने सर्वसम्मतया वातावरण तयार जुगु ख ।
अथेहे संविधानया चरित्र नं सामन्तवाद व साम्राज्यवाद विरोधि सारतत्व दुगु जुइमागु धासें कार्य योजनाय् छुं संशोधन यानातगु स्रोतं धागु दु । थ्व स्वया न्ह्य आइतवा च्वंगु वैठकं सरकारय् समावेशी ब्वति मिसातय्गु स्वीस्वंगु प्रतिशतया माग व पार्टी सेना व मोर्चाया पदाधिकारी स्तरय् उपयुक्त कार्य विभाजन यागु ख । ल्यं दुगु कार्य विभाजनया क्वछीना छवायादुने स्थायी समितिं तयेगु नं थौंया वैठकं निर्णय याःगु दु ।
