भारतं नेपाःमिया सीम्ह लःल्हात
आइतबाः न्हिनय् भारतया देहरादुनलिक्क बसय् हाइटेन्सन प्रसारण लाइनपाखें करेण्ट ज्वना सीपिं न्याम्ह नेपाःमिपिनिगु सीम्ह भारतीय प्रहरीं सोमवाः सुथय् काचनपुरया गड्डाचौकी थ्यंकूगु दु । ईलाका प्रहरी ज्याकू गड्डाचौकीया रोहबरय् सीम्ह उमि हे थःथितिपिंत जिम्मा बिइगु ज्या न्ह्याकूगु जानकारी ब्यूगु खः ।
ज्या मालेगु झ्वलय् भारत हिमाञ्चल प्रदेशया शिमला जःखःया क्षेत्रय् वनेत्यंपिं नेपाःमि ज्याकःमि युवात गःगु बसय् करेण्ट प्रवाह जुयाः न्याम्ह घटनास्थलय् हे सीगु खः । घटनाय् कैलाली फुलवारी - ३ या नीस्वदँया सुखराम चौधरी कैलालीया हे हसुलिया - १ या स्वीदँया बमबहादुर चौधरी सल्यान कालिमाटी काल्चे - ३ या नीस्वदँया धनबहादुर खत्री कैलाली मसुरिया - ७ या झिंन्ह्यदँया मनोज चौधरी व जाजरकोटया पुनम - २ या नीनिदँया शेरबहादुर अधिकारी जूगु ईलाका प्रहरी ज्याकू गड्डाचौकीया इाचार्ज सइ नेत्र भट्टं जानकारी बियादिल । कैलालीया जक पीप्यम्हसिया पुचःलिसे आपालं नेपाःमिपिं यात्रा यानाच्वंगु उगु बसय् चालकं नेपाःमिपिंत बसदुने थाय् मदु धकाः बसया छतय् छ्वयेत्यंगु अवस्थाय् थज्याःगु दुर्घटना जूगु खः । न्याम्ह घटनास्थल लिक्कया विकाशनगर सामुदायिक अस्पतालय् वासः जुयाच्वंगु दुसा उगु घटनालिपा टोलीलिसे हे दुिपं मध्ये नीप्यम्ह थःथितिपिनिगु सीम्ह ज्वनाः नेपाः लिहांवःगु दु ।
