सार्क राष्ट्रया प्रतिनिधितय् क्षेत्रिय गोष्ठी यलय् शुरु
दक्षिण एशियाली क्षेत्रीय सहयोग संगठन सार्क सम्बद्ध राष्ट्रया प्रतिनिधितय्गु क्षेत्रीय गोष्ठी सोमवाःनिसें यलय् न्ह्याःगु दु । सम्मेलनय् सार्क राष्ट्रया मानव अधिकारकर्मीतय्गु ब्वति दुगु खः ।
गोष्ठीइ सार्क क्षेत्रय् मानव अधिकारया अवस्थाय् सुधार हयेत थःथवय् सहकार्य यायेगु बारे सहलह जुइगु धाःगु दु । गोष्ठीया उलेज्या यानादिसें संविधानसभा नायः सुवास नेम्वाङं सार्क क्षेत्रया मानव अधिकारया स्थिति सन्तोषजनक मदुगु धयादिल । वय्कलं विधिया शासन पलिस्था मजूत्तले मानव अधिकारया ग्यारेन्टी जुइमफइगु धयादिल ।
ज्याझ्वलय् ब्वति दुपिं अधिकारकर्मीतय्सं मानव अधिकारया अवस्थाय् सुधार हयेत सम्बन्धित देय्या सरकारत जिम्मेवार जुइमाःगु बिचां प्वंकूगु खः ।
