सशस्त्र समुहया प्यम्ह कार्यकर्ता पक्राउ
थीथी थासय् जूगु बम विष्फोटनया घटनाय् ल्हाः दुगु द्वपनय् प्रहरीं सिराहाया लाहानपाखें सोमवाः वंगु बहनी सशस्त्र भूमिगत जनतान्त्रिक तराई मुक्तिमोर्चा राजन मुक्ति समूहया प्यम्ह कार्यकर्तातय्त ज्वंगु दु । ज्वंपिं धनुषा लक्कड - ८ या नीप्यदँया मुक्ति धइम्ह बुलन यादव महोत्तरी लक्ष्मीनिया - ५ या नीदँया सरोजकुमार महतो सप्तरी रामपुर मल्लहनिया - ८ या नीप्यदँया सन्तोषकुमार मण्डल व सिरहाया लहान - ७ या नीन्यादँया सोनी धइम्ह मोहम्द मजरुल हकपिं खः ।
उमिसं वंगु वैशाख ४ गते सगरमाथा यातायात व्यवस्था ज्याकू लाहान व असार ३१ य् जिल्ला विकास समितिया ज्याकू लाहानय् विष्फोट याकूगु स्वीकार याःगु प्रहरीं जानकारी ब्यूगु खः ।
