खनालं मुकेश नापलात

प्रधानमन्त्री झलनाथ खनालं जनआन्दोलन ०६२÷०६३ या घाःपाः मुकेश कायस्थया स्वास्थ्य अबस्थाबारे जानकारी कयादीगु दु । पार्टीया राष्ट्रिय कार्यकर्ता भेलाय् ब्वति कायेत काभ्रेया धुलिखेल झायादीम्ह खनालं आइतवाः सुथय् कायस्थयात नाप लानादीगु खः ।

जिउँदो सहिदया उपमा दुम्ह कायस्थयात नापलायेत प्रधानमन्त्री खनाल आइतवाः सुथय् बनेपासं च्वंगु कायस्थया हे निवास थ्यंकादीगु खः । स्रोतयाकथं कायस्थया परिवारं जनआन्दोलनया सहिद व घाःपाः जूपिनिगु भावनाकथं इलय् हे शान्ति व संविधानयात निष्कर्षय् थ्यंकेमाःगु दलत सत्ताया लुछाचुडीइ वंगु जानकारी ब्यूसें खनाललिसे दुःख प्वंकूगु खः । लिसलय् खनालं शान्ति व संविधान च्वयेगुया आपालं विषयसं सहमति जुइधुंकूगु व ल्यं दुगु विषयसं नं सहमतिया कुतः जुयाच्वंगु जानकारी ब्यूगु खः ।

आन्दोलनया इलय् बनेपाय् गोली लानाः घाःपाः जूम्ह कायस्थ आः नं अर्धचेत अवस्थाय् हे दनि ।