माओवादी कुचादलीगु मम्हंकूसां ज्यू : प्रचण्ड
एकीकृत नेकपा माओवादीया नायः प्रचण्डं शान्ति प्रकि्रया व संबिधान निर्माणया कार्यभारयात पूवंकेत पार्टीयात छधी यानाः न्ह्यःने न्ह्याकेगु धयादीगु दु । प्रगतिशील नागरिक समाजपाखें थौं येँया कमलादीसं च्वंगु प्रज्ञा भवनय् ग्वसाः ग्वःगु छगू ज्याझ्वलय् न्ववानादिसें वय्कलं अन्तर संघर्षया पाय्छिकथंया व्यवस्थापन यानाः न्ह्यःने न्ह्यायेगु धयादीगु खः ।
वय्कलं पार्टीइ थौंकन्हय् न्ह्यानाच्वंगु अन्तर संघर्षयात तज्याःगुलिसे मस्वायेत नं फुक्कसित इनाप नापं यानादीगु दु । माओवादी पार्टी एकता संघर्ष हिउपाः व न्हूगु आधारय् न्हूगु एकताया लिसे न्ह्यःने न्ह्याइगु प्रचण्डया दाबी दु । प्रचण्डं शान्ति प्रकि्रयायात लिच्वलय् थ्यंकेत थः दृढ दुगु धयादीगु खः । ज्याझ्वलय् नागरिक समाजया न्ह्यलुवाःत डा।सुन्दरमणि दिक्षित श्याम श्रेष्ठ लगायतिपंसं थःथःगु नुगः खँ प्वंकादीगु खः ।
