माओवादीया कारणं शान्ति प्रक्रियाय् अबरोध
प्रधानमन्त्री झलनाथ खनालं एकीकृत नेकपा माओवादीदुनेया आन्तरिक कचवंया हुनिं संविधान निर्माण व शान्ति प्रक्रियाया ज्या समस्याय् लाःगु द्वपं बियादीगु दु । नेपाल कम्युनिष्ट पार्टीया संस्थापक पुष्पलाल श्रेष्ठया स्वीप्यक्वःगु स्मृति दिवसया लसताय् किपूया चम्पादेवीसं दुगु श्रेष्ठया झ्वाताय् स्वांमाः क्वःखायेके धुंकाः न्ववानादिसें वय्कलं थज्याःगु द्वपं बियादीगु खः ।
देय्या समस्या ज्यंकेगु नितिं राष्ट्रिय सहमतिया विकल्प मदुगु खँ नापं लिसा कयादिसें खनालं सहमति जूसा थः न्ह्याग्गु इलय् नं पद त्वःतेत तयार दुगु नापं स्पष्ट यानादीगु खः । ज्याझ्वलय् एमाले वरिष्ठ नेता माधवकुमार नेपालं वामपन्थी व प्रजातान्त्रिक शक्तित छधी मजूत्तले देशं गति मकाइगु धयादीगु दु । थ्वहे दथुइ नेपाल कम्युनिष्ट पार्टीया संस्थापक पुष्पलाल श्रेष्ठया स्वीप्यक्वःगु स्मृति दिवस थौं देय्न्यंक थीथी ज्याझ्वः यानाः हनेगु ज्या जूगु खः । बिक्रम संवत् १९८१ असार १५ गते रामेछापया भंगेरीसं जन्म जुयादीम्ह पुष्पलालं २००६ साल बैशाख १० गते भारतया कलकत्ताय् नेपाल कम्युनिष्ट पार्टीया पलिस्था यानादीगु खः । पुष्पलाल श्रेष्ठ नेपाल कम्युनिष्ट पार्टीया संस्थापक मू छ्याञ्जे खः ।
सन् १९४७ सं नेपाली राष्ट्रिय कांग्रेसया ज्याकू छ्याञ्जेपाखें विद्रोह यानाः कम्युनिष्ट आन्दोलनय् न्ह्यज्याःम्ह पुष्पलालं कार्ल माक्स्रं च्वयादीगु कम्युनिष्ट पार्टीया घोषणा पौयात नेपाली भाषां अनुवाद यानाः उकिइ ताःहाकःगु भूमिका नापं च्वयादीगु खः । २०१७ सालय् भारत प्रवासय् झायादीम्ह पुष्पलालया २०३५ सालय् थौंया हे दिंसं भारतय् हे मदुगु खः । वय्कलं च्वयादीगु कृतित नेपाःया कम्युनिष्ट आन्दोलनया नितिं महत्वपूर्ण नीधिया रुपय् दु ।
