पुष्पलालया लाइन क्रान्तिया लाइनः ज्ञवाली
नेपाल कम्युनिष्ट पार्टी माक्स्रवादी या नायः माधव ज्ञवालीं नेपालय् जनवादी क्रान्तिया लाईन हे पुष्पलालया लाईन जूगु बिचाः प्वंकादीगु दु । थौं पुष्पलाल स्मृति दिवसया लसताय् रिपोर्टस्र क्लबय् ग्वसाः ग्वःगु विचाः गोष्ठीइ न्ववानादिसें वय्कलं नेपालय् संयुक्त जनआन्दोलनया लाईन बिना पाचायती व्यवस्था व राजतन्त्रया अन्त्य जुइफइ मखु धइगु खँ नं पुष्पलालया अवधारणा दुगु न्ह्यःथनादीगु खः । वय्कलं माओवादी पार्टी राष्ट्र राष्ट्रियता व नेपाली जनताया उन्मुक्तिया नितिं पलिस्था जूगु धाःसा नं अथे जुइमफुगु द्वपं बियादीगु खः ।
वामपन्थी नेता नरबहादुर खाँडं प्रत्येक नेपाःमिं सुगौली सन्धी खारेजीया माग तयाः आन्दोलनय् कुहांवयेमाःगु धयादीगु खः । ज्याभुवलय् जनमोर्चा नेपालया न्वकु मोहन बहादुर सिंहं कम्युनिष्ट विचाः मिलय् जूपिं छधी जुयाः जनमुक्तिया नितिं न्ह्यःने न्ह्यायेत फुक्कसित इनाप नापं यानादीगु दु । संयुक्त जनमोर्चाया मू छ्याञ्जे केशव देवकोटां पुष्पलालयात दूरदर्शी कम्युनिष्ट नेताया रुपय् चित्रण यानाः कम्युनिष्ट पार्टीया पलिस्था दिवस छन्हु हे हनेमाःगु खँय् बहः नापं बियादीगु खः ।
