धौख्यलय् एमालेया गोष्ठी
नेकपा एमालेया विधान संशोधन लगायत बिषयसं सहलह यायेत थौं काभ्रेया धुलिखेलय् राष्ट्रिय कार्यशाला गोष्ठी न्ह्याःगु दु । जिल्ला कमिटीया नायः अञ्चल इञ्चार्ज व छ्याञ्जे लिसे केन्द्रीय तहया थीथी विभागया प्रमुखलिसे थ्यंमथ्यं निसःम्ह नेता व न्ह्यलुवाः कार्यकर्तापिनिगु गोष्ठीइ ब्वति दुगु खः ।
संगठन-विभागपाखें ग्वसाः ग्वःगु निन्हुया गोष्ठीया उलेज्या नायः लिसे प्रधानमन्त्री झलनाथ खनालं यानादीगु खः । गोष्ठीं ब्यूगु सुझावया आधारय् केन्द्रीय कमिटीं तयार याइगु विधान संशोधनया मस्यौदा भदौया लिपांगु वालय् जुइगु प्रतिनिधि भेलाय् न्ह्यःब्वयेगु मू दुजः योगेश भट्टराईं जानकारी बियादीगु खः । विशेषयानाः विधान संशोधनय् सुझाव कायेत गोष्ठीया ग्वसाः ग्वःगु जूसां नं एमाले नेतातय्सं अनूकुलया बिषय ल्ह्वनेत थः पक्षया न्ह्यलुवाः कार्यकर्तातय्त जानकारी नापं ब्यूगु खःसा मेमेगु बिषयसं नापं सहलह जुइगु स्वभाविक जूगु मू दुजः भट्टराईं जानकारी बियादीगु खः ।
बरीष्ठ नेता माधवकुमार नेपाल व स्थायी समिति दुजः केपी ओली पक्षधरं धाःसा विधान संशोधन स्वयाः नं एकीकृत नेकपा माओवादीलिसे याःगु न्ह्यगू बुँदे सहमति सरकारया नीति लिसे ज्याझ्वलय् जनयुद्ध खँग्वः न्ह्यःथनातःगु लगायत मुद्दा ल्ह्वनेगु तयारी याःगु जानकारी ब्यूगु खः ।
