झापाय् च्या मजदुरतय् माग पूवंकेत पीच्याघौया अल्टिमेटम
झापाया च्या मजदुरतय्सं थःपिनिगु नीच्यागू सूत्रीय मागयात सरकारं बेवास्ता याःगु जानकारी ब्यूसें माग पूवंकेत पीच्याघौया अल्टिमेटम ब्यूगु दु । थ्व ईया सीमादुने माग पूमवंसा यातायातय् पंगः थनेगु आम हड्ताल लिसे नाका बन्द लगायतया विरोधया ज्याभुवः यायेगु ख्याच्वः ब्यूगु दु ।
झापाया बिर्तामोडय् पत्रकार सम्मेलन यानाः नेपाल चिया मजदुर यूनियन नेपाल चिया बगान श्रमिक संघ व अखिल नेपाल चिया मजदुर संघं मंकाः रुपं आन्दोलनया घोषणा याःगु खः । उमिसं साउन ८ गते नेपाल चिया उत्पादक संघया ज्याकू घेरे यायेगु १० गते तयारी चिया मीगुलिइ पनेगु १२ गते मेची अाचल न्यंकलं छघौ यातायतय् पंगः थनेगु १५ गते काँकडभिट्टा नाका बन्द व १७ गते मेची अञ्चलन्यंक आम हड्तालया ज्याभुवः लगायत न्ह्यःने न्ह्याकूगु खः ।
संचय कोषया व्यवस्था जुइमाःगु मेमेपिं मजदुर सरह ज्याला दयेमाःगु उपदानया व्यवस्था जुइमाःगु विभेद्कारी श्रम कानुनया खारेजी लगायतया नीच्यागू सूत्रीय माग उमिगु दुगु खः ।
