आःयात न्हूगु सरकार गठन याके बीमाः

न्हूगु सरकार गठनया लागिं माओवादीं याःगु कुतः विफल जुइवं आः एमालेया वरिष्ठ नेता माधव नेपालया नेतृत्वय् सरकार गठन जुइगु करिब निश्चित जूगु दु । उकिया नितिं माधव नेपालया पक्षय् करिब ३५० म्ह सभासदया हस्ताक्षर खायेधुंकूगु दुसा वय्कलं सरकार गठन यायेगु औपचारिक दावी नं यानादीधुंकूगु दु । थज्याःगु अवस्थाय् सरकारं राजीनामा बीधुंकूगु माओवादीं संसद चले याके मबिउगु कारणं न्हूगु सरकार गठनया ज्या थातिं लानाच्वंगु दु । उकुन्हु सरकार गठनया लागिं माःगु बहुमत हे खाके मफयाच्वंगु इलय् तक ला सदन न्ह्याके मफुसां छुं समस्या मदुगु खः । तर आः एमालें बहुमत खाकाः सरकार गठनया दावी हे यायेधुंकूगु अवस्थाय् नं संसद न्ह्याके मबिल धाःसा उकिं माओवादीया झेल्लाः प्रवृत्ति स्पष्ट खने दइ । माओवादी छखे सरकारय् हे दनिसा मेखे सरकार नं गठन याके मबीबलय् थुकिं माओवादीं सरकारं राजीनामा बियाः मुंकूगु साख कुहां वइगु खतरा दु । आः माओवादीं गुगु मुद्दा ल्ह्वनेत स्वयाच्वंगु खः व न्हूगु सरकार वयेधुंकाः याःसा बांलाइ । न्हूगु सरकार हे गठन मयाकुसे अज्याःगु माग तयेगु सिबें सरकार गठन याकेधुंकाः वयां लिपा थःगु माग तयेगु व उकियात पूरा मयात धाःसा सदन जक मखु सरकार तकं चले याये मफइगु अवस्था सिर्जना याना बिल धाःसा व बरु संसदीय व सभ्य पलाः जुइ । उकिया नितिं बरु न्हूगु सरकारयाके निश्चित ई कायेगु व उलिया दुने नं पूरा मयात धाःसा सरकार हे चले याये मफइ कथंया ज्याझ्वःत न्ह्याकेगु उपयुक्त जुइ । अज्याःगु इलय् माओवादीया पलाःयात सुनां नं पाय्छि मजुल धकाः पितं धस्वाकेगु ज्या याये फइ मखु ।

More Stories Like this