बुद्ध जयन्तीया लसताय् न्वचु कासा
ख्वप (सन्ध्या टाइम्स) / २५५३ क्वःगु बुद्ध जयन्तीया लसताय् ख्वपय् न्वचु कासा जुल । मैत्रेय युवा संघ ख्वपपाखें उगु कासा ग्वसाः ग्वःगु खः । मस्तय्गु व्यक्तित्व विकास यायेगु व प्रतिभा विकास यायेगु ताः तयाः उगु ज्याझ्वः जूगु खँ ग्वसाः खलकं धाःगु दु । कासाया उलेज्या संघरक्षितं यानाबिज्यागु खः । कासाय् मुक्कं झिम्ह कासामितय्सं ब्वति काःगु खः ।
जयकीर्ति विहार थथुबहीइ जूगु कासाय् सुलोचना कोजू न्हाप विशाखा शाक्य लिउ व प्रमिला धुख्वाः लिउया लिउ लाःगु खः । नापं हःपाः सिरपाः निलम धुख्वाःयात लाःगु खः । 'पूजा याये बहःपिंत पूजा यायेनु' धइगु मू विषयय् उगु कासा न्ह्याःगु खः । कासाया निर्णायक मण्डलय् कृष्णकुमार प्रजापति व लक्ष्मीचन्द्र बज्राचार्यिपं च्वनादीगु खः।
ज्याझ्वलय् त्याःपिं व सहभागीपिंत अन हे मूपाहांपाखें सिरपाः व दसिपौ इनेज्या नं जूगु खः । पाचशील प्रार्थना याना शुरु जूगु ज्याझ्वलय् कृष्णचन्द्र बज्राचार्यं लसकुस न्वचु व सविना बाटीं सुभाय् देछागु खः । ज्याझ्वः तीर्थराज बज्राचार्यया सभापतित्वय् जूगु खः ।
