धोबिघाटय् स्वम्ह न्वकुतय् बिस्कं भेला / केन्द्रीय मुँज्या हानं स्थगित
आन्तरिक विवादय् लानाच्वंगु एनेकपा (माओवादी)या स्वम्ह न्वकुतय्सं थौं यलया धोबिघाटय् छगू बिस्कं भेला यात । थौं च्वनेमाःगु केन्द्रीय मुँज्या तकं लिछ्यानाः स्वम्ह न्वकुतय्सं उगु भेला याःगु खः । भेलाय् पार्टी न्वकुत मोहन वैद्य 'किरण', डा. बाबुराम भट्टराई व नारायणकाजी श्रेष्ठ 'प्रकाश' नापं मू छ्याञ्जे रामबहादुर थापा 'बादल'या ब्वति दुगु खः ।
यलया धोबिघाटस्थित सिद्धार्थ कजेलय् नायः पुष्पकमल दाहाल 'प्रचण्ड' बाहेकया भेलाय् पार्टीया कार्यविभाजनया बारे खँ जूगु सीदुगु दु । केन्द्रीय मुँज्याय् नायः प्रचण्डं न्ह्यब्वःगु तात्कालिक कार्ययोजनाय् नेतातय् कार्यविभाजन बारे मौन च्वेवं असन्तुष्ट न्वकूतय्सं उगु विषययात सशक्त रुपं ल्ह्वनेत उगु भेलाया आव्हान याःगु खः ।
भेला लिपा न्वकु किरणं नायः प्रचण्डयात जनवादी सिद्धान्त कथं न्ह्याकेत थुगु भेला च्वंगु खँ धयादिल । अथेहे मेम्ह न्वकु प्रकाशं पार्टीयात अझ सुद्धिढ व छप्पँ यानाः यंकेत भेलाया आव्हान याःगु खँ धयादिल ।
न्वकु किरणया आव्हानय् थौं स्थगित याःगु केन्द्रीय मुँज्या आः कन्हय् जक च्वनीगु जूगु दु ।
