कांग्रेसं प्रमया लोभ त्याग यानाः थ्वहे सरकारय् वनेमाः : कोइराला
नेपाली कांग्रेसया नेतृ सुजाता कोइरालां कांग्रेसं वर्तमान झलनाथ खनाल नेतृत्वया सरकारय् हे ब्वति कायेमाःगु खँ धयादीगु दु । माओवादी व एमाले छथाय् च्वना नीस्वंगु सरकारय् कांग्रेस मवंसाः ल्यूने लाइगु ख्याच्वः बियादिसें वय्कलं वर्तमान नेतृत्वया सरकारय् वनेमाःगु बिचाः प्वंकादिल ।
रिपोटर्स क्लबं थौं याःगु साक्षात्कार ज्याझ्वय् वय्कलं कांग्रेसं प्रधानमन्त्रीया लोभ त्याग यानाः वर्तमान सरकारय् हे बांलागु मन्त्रालयत कयाः वनेगु उपयुत्त जुइगु धयादिल । वय्कलं माओवादी नायः प्रचण्ड नेतृत्वया सहमतिय सरकार गठन जूसां कांग्रेसं उकि ब्वति कायेमाःगु धयादिल ।
कांग्रेस थ्वहे सरकारय् ब्वति कायेधुंकाः सु सहमतिय सरकारया पक्षय् दु, सु मदु धइगु स्पष्ट जुइगु धयादिसें कोइरालां माओवादी पार्टी दुने जुयाच्वंगु विवाद कांग्रेसयात सरकारय् ब्वति कायेमबिइगु चाल जूगु टिप्पणी यानादिल ।
