'केन्द्रीय समितिया मू एजेण्डा कार्यविभाजन'
एकीकृत नेकपा (माओवादी)या छ्याञ्जे सीपी गजुरेलं पार्टीया केन्द्रीय समितिया मू एजेण्डा हे पार्टी नेतातय् कार्यविभाजन जूगु खँ धयादीगु दु ।
रिपोटर्स क्लबं थौं येँय् याःगु छगू साक्षात्कार ज्याझ्वलय् नेता गजुरेलं फुक्कं जिम्मेवारी पार्टी नायःलय् जक निहीत जूगुलिं पार्टीया निर्णय कार्यान्वयन यायेत थाकुगु धयादिसें केन्द्रीय मुँज्यां थुकियात हल याइगु दावी यानादिल ।
वय्कलं मुँज्यां सरकार व संसदया जिम्मेवारी क्वःछिइ धुंकाः जक संगठन, अन्तर्राष्ट्रिय व लडाकूया जिम्मेवारी मेमेपिं नेतातय्त बिइगु धयादिल । वय्कलं संसदीय दलया नेतातय् न्वकु डा. बाबुराम भट्टराईया सम्भावना अप्वःगु धयादिसें संसदीय दलया नेता हे प्रधानमन्त्री जुइगु नं धयादिल ।
झलनाथ खनाल नेतृत्वया सरकारया आयु क्वचायेधुंकूगु दावी यानादिसें वय्कलं आः माओवादी नेतृत्वया सरकार गठन जुइगु धयादिल । भदौ १४ गते लिपा माओवादी नेतृत्वया सरकार गठन यायेगु निंतिं प्रधानमन्त्री खनालं राजीनामा बिइगु सहमति न्हापा हे जुइधुंकूगु खुलासा नं वय्कलं यानादिल ।
