आः जातीय जनसरकार दयेकः वनीगु
येँ (सन्ध्या टाइम्स) / न्हूगु सरकार गठनया ज्याय् माओवादीं आलटाल यानाच्वंसां दुनें दुनें धाःसा जनसरकार गठनया तयारी यानाच्वंगु खँ सीदुगु दु । सरकार त्वःतेधुंकल कि माओवादीं शुरु याइगु न्हूगु पलाः आः थ्वहे जुइगु खँ धाःगु दु । सूत्रतय्सं बिउगु जानकारी कथं आः माओवादीं थःपिंसं तयार यानातःगु संघीय संरचना कथंया प्रदेशय् जनसरकार गठनया तयारी शुरु यायेत्यंगु दु ।
माओवादीं आः दयेकीगु जनसरकारया स्वरुप मुक्कं जातीय स्वशासनय् आधारित जुइगु खँ नं सूत्रं धाःगु दु । माओवादीं जनयुद्धकालय् दयेकूगु जनसरकार जिल्लाया नां तयाः खःसा आः जातीय प्रदेशया नां तयाः दयेकी । अज्याःगु प्रदेशय् माओवादीं जातीय स्वशासनया अभ्यास शुरु यासें अनया सरकारी ज्याकू स्कूल अदालत स्थानीय निकाय आदि थासय् अनया हे भाषा लागू याकेगु उगु लागाय् बाहुल्यता दुपिं स्थानीय आदिवासीयात समावेशीकरण यायेगु ज्याखँत याइगु खँ नं धाःगु दु ।
लिसें अज्याःगु जनसरकारं राष्ट्रपति डा. रामवरण यादव विरोधी ज्याझ्वःत न्ह्याकां तुं च्वनीगु व अन
राष्ट्रपतियात समर्थन याईपं मनूतय्त तकं बहिष्कार यायेगु नीति ज्वनीगु खँ नं सूत्रं धाःगु दु । राजधानीइ राष्ट्रपतिया मुद्दायात कयाः तःधंगु आन्दोलन यानां तुं च्वनीगु जानकारी नं सूत्रं बिउगु दु ।
