किपुली छेँखापितं हाकुगु ध्वाँय्
किपू (सन्ध्या टाइम्स) / थ्वहे वइगु जेठ १८ गते हाकुगु न्हि हनेगु झ्वलय् नेवाः स्वायत्त राज्य मंकाः संघर्ष समितिं यायेत्यंगु नेपालमण्डल बन्द ताःलाकेगु लागिं किपुली थीथी कथंया ज्याझ्वःत याइगु जूगु दु । उकिया नितिं संघर्ष समितिया किपू समन्वय समितिं कोणसभा जुलुस अन्तरक्रिया ज्याझ्वःत दयेकुगु दु ।
बन्दया आह्वान यासें जेठ ९ निसें १४ गते तक किपू नगां पांगा चोभार बाहिरगां आदि लागाय् कोणसभा याइगु ग्वसाः दु । ९ गते कुन्हु किपूया नयाँ बजारंनिसें छेँखापतिकं हाकुगु ध्वाँय् ब्वयेकेगु ज्याझ्वः नं दु । उकथं १५ गते बाघभैरवय् नेवाः सभा १६ गते मिसापिनि जक जुलुस १७ गते मशाल जुलुस व १८ गते सुथंनिसें बन्दया आह्वान यानाः थाय्थासं जुलुस पिकायेगु ज्याझ्वः दयेकातःगु दु ।
