माओवादी मुँज्या स्थगित
एनेकपा (माओवादी)या थौं च्वनीगु धकाः क्वःछिनातःगु केन्द्रीय समितिया मुँज्या स्थगित जूगु दु ।
माओवादी मू ज्याकू कोटेश्वर पेरिस डाँडाय् सःतुगु केन्द्रीय मुँज्या गृहकार्य मगाःगु धासें कन्हय् तकया निंतिं स्थगित याःगु खः । वंगु असार १० हे च्वनेगु धकाः क्वःछिनातःगु माओवादी केन्द्रीय मुँज्या आन्तरिक विवादया हुनिं म्हिग तिनि सुरु जूगु खः ।
म्हिग च्वंगु मुँज्याय् नं पार्टी नायः पुष्पकमल दाहाल 'प्रचण्डं' तत्कालिक कार्ययोजना न्ह्यब्वयेवं १० मिनेटया दुने हे मुँज्या क्वःचाःगु खः । मुँज्याय् प्रचण्डं पार्टीया आगामी कार्ययोजना नापं शान्ति प्रक्रिया व संविधान निर्माणया विषयलय् केन्द्रित जुया तत्कालिक कार्ययोजना न्ह्यब्वयादीगु खः ।
तर न्वकूत मोहन वैद्य 'किरण' व डा. बाबुराम भट्टराईं पार्टी नेतातय् कार्यविभाजन बारे सम्बोधन यायेमाःगु माग यानाच्वंगु विषयलय् धाःसा नायः प्रचण्डया कार्ययोजना मौन खनेदुगु खः । कार्यविभाजनया विषय मौन जूगुलिं निम्ह न्वकूतय्सं नायःया कार्ययोजना प्रति असन्तुष्टि प्वंकूगु खँ सीदुगु दु ।
