हानं मेगू मधेसी दल तज्यात
मधेसवादी दलत तज्यायेगु ज्यां थौं हानं निरन्तरता काःगु दु । राजेन्द्र महतोया अध्यक्षताय् दुगु सद्भावना पार्टी तज्यानाः न्हूगु पार्टी गठन जूगु दु । महतोया पार्टीपाखें सभासद् अनिल झाया नेतृत्वय् संघीय सद्भावना पार्टी गठन जूगु खः ।
प्यम्ह सभासद्त दुथ्याकाः झाया नेतृत्वय् गठन जूगु न्हूगु पार्टी थौं हे संविधानसभाय् दर्ता जूगु दु । उगु पार्टीया सचेतकय् सभासद् महेशप्रसाद यादव च्वनादीगु दु । झा व यादव नापं उगु पार्टीइ सभासद्त खोभारी राय व मालावती देवी राना दुथ्याःगु दु । महतो नेतृत्वया सद्भावनाय् गुम्ह सभासद्त दुगु खःसा आः पार्टी विभाजन जुइवं उगु पार्टीइ न्याम्ह व झा नेतृत्वया पार्टीइ प्यम्ह सभासद् दुथ्याःगु दु ।
लिप्पांगु इलय् मधेसवादी दलत विभाजन जुइगु झ्वः अप्वयेवं संविधानसभाय् प्रतिनिधित्व याइगु राजनीतिक दलतय् ल्याः नं अप्वया वंगु दु । थौं जूगु सद्भावना पार्टी विभाजन नापं आः संविधानसभाय् प्रतिनिधित्व याइगु राजनीतिक दलतय् ल्याः स्वीछगू थ्यंगु दु ।
