राष्ट्रिय व क्षेत्रीय प्रतिभा पुरस्कारपाखे झिंखुम्ह श्रष्टात सम्मानित
भाषा, साहित्य, कला, संस्कृति नाट्य संगीत आदि लागाय् विशिष्ट योगदान बियादीपिन्त थौं छगू ज्याझ्वःया दथुई प्रधानमन्त्री झलनाथ खनालं राष्ट्रिय व क्षेत्रीय प्रतिभा पुरस्कारपाखे झिंखुम्ह श्रष्टातय्त सम्मानित यानादिल ।
ज्याझ्वःया उलेज्या यानादिसें प्रधानमन्त्री खनालं कला साहित्य संस्कृति देय्या धरोहर जूगुलिं थुकिया विकासया लागि प्रतिष्ठानं ठोस कार्ययोजना हःसा सरकारं उकियात ग्वाहालि यायेगु प्रतिबद्धता प्वंकादिल । अथेहे प्रधानमन्त्री खनालं देय् संक्रमणकालया अवस्थां न्ह्यानाच्वंगुलिं थुकियात पाय्छि कथं व्यवस्थापन याःसा देय् आर्थिक समुन्नतिपाखे न्ह्याःवनीगु व अथे मजुल धाःसा प्रतिक्रान्तिपाखे वनीगु खँ धयादिल । अथेहे वय्कलं प्रतिभा धइगु राष्ट्रिय व क्षेत्रीय धकाः ब्वथले मजिउगु व प्रतिभा न्ह्यागु हे जूसां राष्ट्रिय हे जुइगु बिचाः प्वंकादिल ।
ज्याझ्वलय् ललितकला प्रज्ञा प्रतिष्ठानया कुलपति किरण मानन्धरं साहित्य कला संस्कृतिया विकासया लागि माःकथंया बजेट मदुगु खँय् दुःख प्वंकादीगु खःसा राष्ट्रिय पुरस्कार कयादीम्ह प्रा. डा. नोबल किशोर राईं पुरस्कारपाखें वःगु दां जनताया करपाखें वःगुलिं थुकियात व्यक्तिगतया लागि मछ्यःसें छुं नं बांलाःगु ज्या याइगु संस्थायात बीगु धयादिल ।
अथेहे ज्याझ्वलय् संघीय मामिला, संविधानसभा, संसदीय व्यवस्था तथा संस्कृति मन्त्री खगेन्द्र प्रसाद प्रसाई, राष्ट्रिय पुरस्कार कयादीम्ह प्रा. डा. बीणा पौडेल, क्षेत्रीय पुरस्कार त्याकादीिपंपाखें श्रवण मुकाङ्गं नं नुगः खँ प्वंकादीगु खः । थ्वहे झ्वलय् काठमाण्डौं विश्वविद्यालयपाखें महाविद्यावरिधिपाखें सम्मानित जुयादीम्ह जीवित सम्पदा नापं सस्कृतविद् सत्यमोहन जोशीयात प्रधानमन्त्री खनालपाखें सम्मान कथं भगवान बुद्धया मूर्ति लःल्हानादीगु खः ।
खस भाषाया आदिकवि भानुभक्त आचार्यया बुिदंया झ्वलय् जूगु थुगु पुरस्कार इनेज्या ज्याझ्वलय् संघीय मामिला संविधानसभा संसदीय व्यवस्था तथा संस्कृति मन्त्रालयया सचिव मोदराज डोटेलं पुरस्कारया बारे जानकारी बियादीगु खः ।
आ.व. २०५१/५२ सालंनिसें बिउगु राष्ट्रिय प्रतिभा पुरस्कारया राशि छगू लख तका व आ.व. २०६२/६३ निसें क्षेत्रीय श्रष्टातय्त सम्मानित यायेकथं बिउगु क्षेत्रीय प्रतिभा पुरस्कारया राशी न्यय्द्वः तका दुगु खः । ज्याझ्वलय् सकल पुलांपिं संस्कृति मन्त्रीतय्त ब्वनातःगु खःसां नं छम्ह हे उपस्थित जुयामदी ।
