राष्ट्रपति विरुद्ध माओवादीं संसदय् संकल्प प्रस्ताव दर्ता
राष्ट्रपति डा. रामवरण यादव विरुद्ध एकीकृत नेकपा (माओवादीं) बुधवाः संसदय् संकल्प प्रस्ताव दर्ता याःगु दु ।
अन्तरिम संविधान, नागरिक सर्वोच्चता व अधिकार विहिन राष्ट्रपतिया व्यवस्थाया अखः राष्ट्रपति यादवं थःगु पलाः ल्ह्वंगु न्ह्यथंसें प्रस्ताव दर्ता याःगु खः । उगु पलाः अविलम्ब लितः कयाः संवैधानिक व नागरिक सर्वोच्चता बहाल यायेत सदनं राष्ट्रपतियात निर्देशन बीत संकल्प प्रस्तावय् न्ह्यथंनातःगु दु ।
प्रस्तावय् २०६६ वैशाष ३० गते सरकारं प्रधानसेनापतिया चीकेत ब्यूगु निर्देशन राष्ट्रपितं अस्वीकार यानाः असंवैधानिक पलाः ल्ह्वनाः संवैधानिक मर्यादाया उल्लंघन जुया नागरिक सर्वोच्चता निरीह जूगु दाबी यानातःगु दु ।
माओवादी संसदीय दलयात उपनेता नारायणकाजी श्रेष्ठया प्रस्तावयात पोष्टबहादुर बोगटी व वर्षमान पुनया समर्थनय् संकल्प प्रस्ताव संसद सचिवालयलय् दर्ता याःगु दु ।
थ्वस्वयां न्ह्यः थौ सुथय् माओवादी सचिवालयया बैठकं राष्ट्रपति विरुद्ध संकल्प प्रस्ताव दर्ता यायेगु निर्णय याःगु खः ।
थ्वहे दथुइ नेपाली कांग्रेसं धासाः संसदय् संकल्प प्रस्ताव दर्ता जूगुलि असन्तुष्टि प्वंकूगु दु । संविधानसभाया अध्याक्ष सुभाषचन्द्र नेम्वाङयात नापलानाः कांग्रेस प्रमुख सचेतक लक्ष्मण घिमिरे अदालतय् विचाराधिन मुद्दाय् संसदय् सहलह यायेमज्यूगु खँय् ध्यानाकर्षण याकूगु दु ।
